Д.Болор

УИХ-ын чуулганы нэгдсэн хуралдаанаар өнөөдөр О.Баасанхүү гишүүний санаачилсан хуулийн төслийг хэлэлцэх эсэхийг хэлэлцлээ. О.Баасанхүү Тамхины хяналтын тухай хуулийг хэрэгжүүлэхийн тулд тамхи татах цэг байгуулах ёстой гэж төсөл бичжээ.

С.Баярцогт:

-Тамхины тухай хууль нь энэ парламентын үед баталсан сайн хуулиудын нэг яах аргагүй мөн. Энэ хуулийн ачаар олон хүн тамхинаас гарч,  тамхи сонирхож татах сурагчид буурч байгаа шүү. Үүнийг О.Баасанхүү гишүүн та тооцоолох ёстой.Хоёрдугаарт, өөрийн чинь санаачилсан төсөл шаардлага хангахгүй байна. Үзэл баримтлал нь хүртэл дутуу. Яах вэ, архаг тамхичин хүмүүс бол Тамхины тухай хуулийг унаасай гэж хүсч байгаа нь ойлгомжтой. Тухайлбал, Д.Эрдэнэбат дарга бол архаг тамхичин хүн. Тэгэхээр дэмжих нь гарцаагүй биз. Гэхдээ олон нийт яаж хүлээж авах бол гэдгийг тооцоол.

С.Оюун:

-Хууль сайн хэрэгжиж байгаа учраас заавал хуульд өөрчлөлт оруулах хэрэг байна уу. Энэ хуулийг дэмжихгүй байх нь зүйтэй байх. Хамгийн сайн арга бол тамхи татдаг хүмүүс гэр бүлээ, хүүхдүүдээ бодоод тамхинаас гарах нь зүйтэй.

Я.Содбаатар:

-Энэ хууль сайн хууль гарсан. Энэ хуулийн нэмэлт өөрчлөлтөөр тамхины хуулиа сайжруулж, хууль хэрэгжих явцад зарим нэг зохицуулалт хийх  нь зүйтэй. Алхам гэдгийг метрээр хэмжих нь зүйтэй байх.  Тамхины хууль бус наймаа бий болсон гэдэг зүйл захууд дээр байгаа.

С.Дэмбэрэл:

-О.Баасанхүү маш энгийн зүйл оруулж ирсэн. Олон улсад тамхи татдаг цэг байдаг учраас энэ хүн оруулж ирсэн байна. Хэрэв хүмүүсийн эрүүл мэндэд анхаарч байгаа бол эрүүл мэнд ба ядуурал  гэсэн хурал хийж байхад яагаад үүнд нэгдэж орохгүй байна вэ. Архаг ядуурал, агаарын бохирдол зэрэгт бүгд анхаарлаа хандуулаасай.