Дэлхийн номын өдөртэй зэрэгцэн номын бизнес эрхлэгчдэд Нийслэлийн өмчийн харилцааны газраас нэгэн “бэлэг” барилаа. Тэдний энэ удаагийн бэлэг баяр ёслолынх байсангүй. Номын бизнес эрхлэгчдийг шоконд оруулж, уйлуулж, туйлдуулж орхив. Учир нь Багшийн хөгжлийн ордны хажууд байдаг номын павилонуудыг өнгөрсөн шөнө үүрээр 04.00 цагийн үед албадан буулгав. Дотор нь байх номнуудыг лангуутай нь газар овоолжээ.  Ц.Оюунгэрэл сайдын “Ногоон нүдэн”, ардын уран зохиолч Т.Галсангийн цуврал бүтээлүүд, түүхийн ховор номууд шороотой холилдон хэвтэж байна. Ер нийслэлээс явуулж буй сүүлийн үеийн бодлого шийдвэрүүд ядарсан иргэд рүү чиглэсэн тэднийг хаасан боосон янзтай болоод байх шиг.  Барилгын компаниуд, гадны хөрөнгө оруулагчид хаа хамаагүй газар дээр зөвшөөрөлгүй барилга барьж дураараа дургиж байхад амаа үдүүлсэн мэт байдаг. Гэсэн атлаа ядарсан иргэд рүүгээ “хүч” хэрэглэн дайрч байгаа нь шударга биш баймаар.