Т.САЙХАН Хотын дарга С.Батболд өнөөдөр /09.05/ сэтгүүлчидтэй уулзалт зохион байгууллаа.  Түүний  мэдээллээс онцлон хүргэж байна. -Намайг ажлаа авахад нийслэл 100 орчим тэрбум төгрөгийн өртэй байсан. Харин одоо өргүй нийслэл болсон. -Өнөөдрийг хүртэл нэг  ч газрын зөвшөөрөл олгоогүй. Харин зөрчилтэй 16,8 га газрыг хураан авч, зөвшөөрлийг хүчингүй болгон сургууль цэцэрлэг, оршин суугчдад нь  буцаан олголоо. -2018 онд  нийслэлийн төсвөөр  13.1 километр зам шинээр барьж, 2.2 километр замыг өргөтгөн шинэчилж байна. Дэд  бүтцийн салбарт хийгдэж байгаа хамгийн гол бүтээн байгуулалт нь  БНХАУ-ын  хөнгөлөлттэй зээлийн санхүүжилтээр хийгдэж байгаа  дөрвөн том гүүрийн  төсөл юм. -Сүүлийн үед түгжрэлийг сааруулахад, тэгш, сондгойгоор нь хөдөлгөөнд оролцуулаач гэсэн санал иргэдээс ирэх болсон. Гэхдээ бид түгжрэлийг сааруулахад тэгш, сондгойгоор хөдөлгөөнд оролцуулахаас гадна өөр ямар боломж байна вэ гэдгийг судалж байна. Шууд тэгш, сондгойгоор зорчих шийдвэр гаргахад бас хүндрэлтэй байгаа. - Энэ жил агаарын бохирдлыг бууруулах чиглэлээр хоёр шийдэлд хүрсэн. Тухайлбал,  түүхий нүүрсийг хориглох шийдвэр гарсан. Мөн аравдугаар сарын 1-н гэхэд 100 квт-аас дээш хүчин чадалтай 500 зууханд шүүлтүүр тавина. -Нийслэл хотын захиргааг Яармаг тийш шилжүүлэх ажил эхэлж, барилгын суурийг тавьсан. 2019 онд Хотын захиргаа Яармаг руу нүүж Нийслэлийн Засаг даргын Тамгын газар, нийслэлийн харьяа 33 агентлаг, нийслэлийн өмчит үйлдвэрийн газрууд шилжин байрлах боломж бүрдэнэ. Эх сурвалж:www.polit.mn