С.САРУУЛ Цагдаагийн байгууллагаас хүүхдүүдийг цахим гэмт хэргийн хохирогч болохоос урьдчилан сэргийлж  "UNFRIEND” хөдөлгөөнийг эхлүүллээ. Энэ талаар  ЦЕГ-ын  Хүүхдийг гэмт хэргээс урьдчилан сэргийлэх тасгийн дарга, цагдаагийн хошууч Д.Будзаан “Цахим хэрэглээ нэмэгдэхийн хэрээр гэмт хэргийн тоо өсөж байна. Цахим мэдээллийн аюулгүй байдлын эсрэг гэмт хэрэг өнгөрсөн онд улсын хэмжээнд 299 бүртгэгдсэн бол энэ оны эхний хагас жилийн байдлаар 279 хэрэг бүртгэгджээ. Тухайлбал, “ЭМО” нэртэй фэйсбүүк группууд нээгдэж олон тооны, ихэвчлэн насанд хүрээгүй хүүхэд, залуучуудыг гишүүн болгон элсүүлэн амиа хорлох тоглоом тоглуулсан, иргэн Б бага насны хүүхдүүдтэй чат бичиж тэдний 200 гаруй зургийг авсан. Мөн “Санхүү өгнө авна” зэрэг зарын цаана биеэ үнэлэх хэрэг гарч байна. Хүүрдүүд цахим орчинд үйлдэгдсэн гэмт хэргийн хохирогч болчихоод хаана хандахаа мэдэхгүй, эцэг эхээсээ нуугаад хэлдэггүй. Энэ талаар цагдаагийн байгууллагад хандвал, хэргийг шалгаад таслан зогсоох боломжтой. Цахим гэмт хэргээс сэргийлэх үүднээс дуучин А cool, МЗХ-той хамтраад unfriend хөдөлгөөнийг эхлүүлж байна. 22 хоног үргэлжлэх энэхүү хөдөлгөөний үеэр 700 орчим ЕБС-д цахим гэмт хэргээс урьдчилан сэргийлэх мэдээлэл хүргэнэ. Мөн томоохон хэмжээний хэлэлцүүлэг зохион байгуулахаар төлөвлөж байна” гэлээ. Монголчуудын 15-60 насны арван хүн тутмын найм нь буюу 1.7 сая хүн ямар нэг байдлаар сошиал медиа ашиглаж байна. Фэйсбүүк хэрэглэгчдийн 23 хувь нь цаг тутам фэйсбүүкээ шалгадаг. Тодруулбал, Улаанбаатар хотын 15-20 насныхны 96 хувь нь өдөр бүр, 46 хувь нь хоёр цаг тутамд шалгадаг гэсэн статистик бий. Эх сурвалж: www.polit.mn