Ц.МЯГМАРБАЯР “Goal Mongolia-2018” өнөөдөр /09.04/ Нүүрсний салбарын өрсөлдөх чадвар сорилт ба боломж сэдвээр чуулганы нэг дэх хэсэг эхэлж Монгол Хятадын нүүрсний салбарын бизнес форумаар хоёрдугаар хэсэг үргэлжилж хөтөлбөр ёсоор 18:00 цагт өндөрлөв. Уг чуулганыг найм дахь жилдээ тасралтгүй зохион байгуулснаар Монгол Улс гэлтгүй Зүүн Азийн нүүрсний салбарын томоохон арга хэмжээний нэг болж өргөжсөн байна. Эх орны эдийн засагт чухал үүрэг гүйцэтгэдэг нүүрсний салбарыг хөгжүүлэх, хөрөнгө оруулалт татах, экспортыг нэмэгдүүлэх замаар зам тээвэр ложистикийн тулгамдаж буй асуудлын шийдэл, гарцыг төр засаг, гадаадын хөрөнгө оруулагчид, хувийн хэвшилийнхэнтэйгээ хамтран хэлэлцэх гол талбар болохыг зорьсон түүндээ хүрч байна хэмээн “Coal Mongolia” чуулганыг үүсгэн байгуулагч “Гложекс консталтинг” компанийн ерөнхий захирал Л.Наранбаатар чуулганы нээлтийн үеэр онцолсон. Монгол Улсын нүүрсний олборлолт нэмэгдэхийн хэрээр уурхайнууд шинээр нээгдэж байна. Зарим уурхайн насжилт нэлээд өндөр болсон. Тиймээс өртөг бууруулах хүрээнд шинэ технологи зайлшгүй шаардлага бий болсон тул  “Технологийн дэвшилд хамтдаа” уриаг энэ жилийн онцлог болгож дэвшүүлсэн байна. Манай нүүрсний гол худалдан авагч Хятад улс их хэмжээний нүүрс импортлох бодлогоо энэ онд болон ирэх онд үргэлжүүлэх хэвээр байгаа ч байгаль хамгаалах бодлого зохицуулалтаас хамаарч нүүрс болон ганга, хар төмөрлөгийн үйлдвэрлэл буурахаар байна. Тиймээс коксжих нүүрсний үйлдвэрлэл өмнөхөөс буурна хэмээн Хятадын коксжих нүүрсний зах зээл, эрэлт, нийлүүлэлт үнэ, өрсөлдөөн сэдвээр илтгэл тавьсан  “Фэнвей Энержи Информэйшн Сервисез” ХХК-ийн дэд ерөнхийлөгч Сара Лиу дурьдаж байв. Мөн 2019 онд Энэтхэг улсны нүүрсний хэрэглээ эрс нэмэгдэхээр байгаа. Энэ орон зайг ОХУ болон бусад орноос өрсөж эзлэх боломж Монгол Улсад байгаа хэмээн  олон улсын шинжээч Пралаб Бхаргава онцлон хэлж байлаа.  Монголд косжих болон чулуун нүүрсний экспортын баримжаатай 20 гаруй уурхай байна. Гэтэл манай улсын нүүрсний экспорт 36 сая орчим тоннд хамгийн ихдээ хүрч чадаж байгаа ч цаана нь ихээхэн нөөц бололцоо ашиглалтгүй үлдэж байна. Тээвэр ложистик, хил гаалийн зохион байгуулалтаас хамааралтайгаар экспортолж чадахгүй үр ашиггүй байдлыг бий болгож байгааг олон улсын шинжээчид илтгэл бүрдээ дурдаж байна. Төмөр замаар биш авто машинаар тээвэрлэлт хийж байгаа тохиолдолд Монгол Улс гурав дахь орны зах зээлд нүүрсээ үнэ хүргэх боломжоо алдсаар байгааг сануулсаар. ОХУ гэхэд жилд урд хөрш руу манайхыг давуулж 480 орчим сая тонн нүүрс экспортолж байна. Энэ бүгд нь хил гааль, тээвэр ложистекийн зохион байгуулалт, дэд бүтэц сайтай байгаа нь давуу болж байна гэдгийг мэргэжилтэнүүд ярьж байв. Тэгэхээр манай улс үүнийг оновчтой болгох төмөр замын тээвэрээр нүүрс экспортлох бодит хэмжээ, ойрын чиг хандлага, шинээр бий болгох гарцуудын талаар маш тодорхой мэдээллийг ЗТХЯ-наас өгнө гэдэг найдлага тавьж буйг гадныхан болоод манай хувийн хэвшлийнхэн хүлээж байна. Ийнхүү эхний өдрийн арга хэмжээ өндөрлөж маргааш үргэлжлэх “Goal Mongolia-2018” аас үр дүнг хүлээж байна. Энэ жилийн тухайд Монголын Хөрөнгийн биржид нээлттэй хувьцаагаа гаргаж буй дотоод болоод гадны 60 гаруй  компани оролцож, үзэсгэлэнгээ гаргаж  байгаагаар онцлог байв. Эх сурвалж: www.polit.mn