С.УЯНГА

Монгол залуус эзэмшсэн мэргэжлээрээ дэлхийд өрсөлдөх цаг удахгүй ирэх нь. Ирэх онд Бразилд болох дэлхийн ур чадварын олон улсын тэмцээнд манай орны мэргэжилтнүүд ур чад­вар, оюун ухаанаараа өрсөл­дөхөөр зэхэж байна.

Дэлхийд нэрээ гар­гаж орон орны тамир­чид­тай өрсөлдөх шилд­гүүдийг тодруулах  “Монгол ур чадвар-2014” тэмцээн өчигдөр эхэл­лээ. Тэмцээнийг Хөдөл­мөрийн яам, Монголын барилгачдын холбоо хамтран зохион байгуулж байгаа юм.

Барилгын техноло­гийн коллеж, Барилгын политехник коллеж, Техник технологийн дээд сургууль болон  Баян-Өлгий, Говь-Алтай, Завхан, Ховд зэрэг 16 аймгийн 20 сургуулийн мэргэжилтнүүд ур чадвар, авхаалж самбаа, оюун ухаанаа уралдуулахаар бэлтгэлээ хангажээ. Оролцогчид эхний шатанд барилгын өрлөг, плита наах, гагнуур, цахилгаан, мужаан, тогооч, токарь гэсэн долоон мэргэжлээр ирэх долоо хоног хүртэл өрсөлдөх юм. 

Эхний тэмцээн өчигдөр Барилгын коллежийн гадна талбайд эхэллээ. Оролцогчид таван цагийн турш  өрсөлдлөө. Өгсөн зааврын дагуу материалаа бэлтгэх бөгөөд хугацаандаа багтаж зураг төсөл, өгөгдлийн дагуу ажлаа гүйцэтгэсэн. Тэмцээний гол шалгуур бол даалгаврыг хугацаандаа чанартай биелүүлэх явдал юм. “Монгол ур чадвар-2014” тэмцээн зохион байгуулагдсанаар мэргэжлийн боловс^­рол сургалтын бай­гууллагуудын ча­дав­хийг дээшлүүлэх сургалтын орчныг сайжруулах, багшийн ур чадварыг дээшлүүлэх, монгол хүний ур чадварыг дэлхийд өрсөлдүүлэх зэрэг олон талын ач холбогдолтой аж. Тэмцээний эхний шат өчигдөр болсон бол ирэх сарын эхээр болох хоёрдугаар шатны шалгаруулалтад  мэргэжил тус бүрээр шилдэг таван мэргэжилтэнг шалгаруулах юм байна.  Тэмцээний тэргүүлэгч 2015 онд болох дэлхийн ур чадварын тэмцээнд оролцохоор жилийн турш тусгайлан бэлтгэгдэнэ.  

Мэргэжлийн боловс­рол сургалтын бодлогын хэрэгжилтийг зохицуулах газрын мэргэжилтэн Р.Дүүрэнбаяр “Энэхүү тэмцээн нь Мэргэжлийн боловсрол  сургалтын байгууллагуудын сургалтын агуулгыг шинэчлэх сургалтын орчинг сайжруулах, мэргэжилтэй ажилтны үнэлэмжийг өсгөж олон улсын чанарт нийцүүлэх  чиглэлээр Хөдөлмөрийн яамнаас хэрэгжүүлж буй томоохон ажлын нэг юм.  Энэ ажлын хүрээнд дэлхийн ур чадварын олон улсын байгууллагад Монгол Улсыг  гишүүнээр элсүүлэх  материалыг холбогдох газарт өгсөн. Цаашлаад монгол мэргэжилтэнг гадаад орнууд захиалдаг болох зорилго тавьж байгаа” гэв.

Дэлхийн олон улсын ур чадварын тэмцээн нь хоёр жил тутам болдог бөгөөд олон орны чадварлаг мэргэжилтнүүд оролцдог гэдэг утгаараа шалгуур үзүүлэлтийн оноо өндөр байдаг гэнэ. Ирэх оны наймдугаар сард болох дэлхийн ур чадварын  тэмцээн 40 гаруй мэргэжлээр зохиогддог бөгөөд манай улсын хувьд долоон мэргэжлээр шилдгүүдийг  явуулна гэдгийг зохион байгуулагчид хэллээ.   Харин тэмцээнд оролцохоор орон нутгаас ирсэн мэргэжилтнүүд 7-10 хоногийн өмнө ирж бэлтгэл сургуулилт хийжээ.