Б.Дамдин-Очир

Мэдээлэл судалгааны “MPO” төвөөс Монголын улс төр нийгэм, эдийн засаг, улс төрд өрнөж буй үйл явдлуудад иргэд хэрхэн хандаж байгааг тодруулдаг “Улс төрийн барометр III шат”-ны дүн гарсан байна. Судалгааг 2014 оны дөрөвдүгээр сарын 1-7-нд хийж, Нийслэлийн зургаан дүүрэг,  Увс, Баянхонгор, Өмнөговь, Өвөрхангай,  Сэлэнгэ, Дорнод аймгийн 1200 иргэнийг хамруулжээ.

“MPO” төвийнхэн Ерөнхийлөгч, УИХ, Засгийн газарт өгч буй иргэдийн үнэлгээг индексжүүлэн тооцдог. Ингэхдээ олон улсын хэмжээнд хүлээн зөвшөөрөгдсөн хэрэглэгчдийн төвшинг тодорхойлоход хэрэглэдэг аргачлалыг ашигладаг ажээ. Нийгмийн, эдийн засгийн судалгаандаа ч энэ аргыг хэрэглэдэг байна.

Тэд улс төр, нийгэм, эдийн засгийн нийт 16 төрлөөр санал асуулга, судалгаагаа явуулжээ.

Зарим дүнгээс дурдвал, Валютын ханшны өсөлтийг “Амьдралд маш хүндээр нөлөөлж байна” хэмээн судалгаанд оролцогсдын 67.8 хувь нь үзсэн бол “Зарим тохиолдолд ийм нөлөө бий” гэж 16.7 хувь нь хэлжээ. Мөн “Валютын ханшны өсөлт мэдэгдэх зүйл алга” гэж иргэдийн 8.8 хувь хэлсэн бол “Хэлж мэдэхгүй байна” гэдгээ 6.7 хувь нь илэрхийлсэн байна.

Түүнчлэн Тамхины хяналтын тухай хуулийг “Хэрэгжиж байна” гэж судалгаанд оролцогчдын 65 хувь нь хэлсэн бол 30.9 хувь нь “Огт хэрэгжихгүй байна” гэжээ.

Үүнээс гадна хэвлэл мэдээллийн  хэрэгслүүдээс хамгийн олон үзэгч, уншигчтайг ч “шалгаруулсан” байна.

Таны тогтмол үздэг ТВ мэдээллийн хөтөлбөр... гэсэн асуултад  судалгаанд хамрагдсан иргэдийн 37.7 хувь буюу хамгийн олон нь МҮОНТВ-ийн “Цагийн хүрд” мэдээллийн хөтөлбөр гэж хариулжээ. Дараагийн хамгийн олон үзэгчтэй ТВ-ийн мэдээллийн хөтөлбөрөөр ТВ9 телевизийн “Энэ өдөр” мэдээллийн хөтөлбөрийг нэрлэсэн байна. Судлагаанд оролцсон иргэдийн 18.6 хувь нь ингэж хэлжээ. ТВ9 телевизийн “Энэ өдөр” мэдээллийн хөтөлбөрийн араас ТВ5 тедевизийн “Цаг” хөтөлбөр 9.1, MN 25 дугаар суваг телевизийн “25 цаг” хөтөлбөр 8.3 хувиар жагссан байна.

Мөн өдөр тутмын сонинуудыг энэ судалгаанд хамруулжээ. Санал асуулгаар иргэдийн хамгийн олон буюу 25.3 хувь нь “Өдрийн сониныг тогтмол уншдаг” гэж хариулсан байна. Дараа нь судалгаанд оролцогчдын 10 хувь нь “Зууны мэдээ сониныг тогтмол уншдаг” гэжээ. Иргэд “Зууны мэдээ” сонины араас 8.7 хувиар “Өнөөдөр” сониныг, 3.4 ххувийн саналаар “Өглөөний сонин”-ыг тус тус нэрлэсэн байна.