Ц.МЯГМАРБАЯР “Төлсөн Авсанаа Нийтэл” буюу “ТАН” иргэний нийгмийн байгууллагуудын эвслээс  ашиг хүртэгч  жинхэнэ эздийг ил болгохоор 20-иод жил үйл ажиллагаагаа явуулсаар иржээ. Тэд “Олборлох салбарын ил тод байдал санаачлага”-д 2006 онд нэгдсэнээр Монгол Улсын уул уурхайгаас ашиг хүртэгч эцсийн өмчлөгчийг 2020 оны нэгдүгээр сарын 1 гэхэд ил тод болгохоор ажиллаж байгаа юм байна. Тэгвэл өнөөдөр “ Зууны мэдээ” сонины “ Үндсэний мэдээллийн төв”-д “ТАН” эвслийн гишүүн байгууллага болох “Хил хязгааргүй алхам” ТББ-ын тэргүүн Н.Баярсайхан,  “Баян шарга” ТББ-ын тэргүүн Л.Бор”, “ Захиргааны шинэ санаачлага” ТББ-ын гүйцэтгэх захирал С. Цэрэнпүрэв, “Хөвсгөл далайн эзэд” ТББ-ын тэргүүн Б.Баярмаа, “Миний Монголын газар шороо” хөдөлгөөний тэргүүн О.Отгонсайхан нар  хэвлэлийн бага хурал хийж үйл ажиллагааныхаа талаар мэдээллээ. Тэд улс төрд нөлөө бүхий, уул уурхайн салбарт хамааралтай гэх төрийн өндөр албан тушаалд өмнө болон одоо ажиллаж байгаа хүмүүс, УИХ-ын 76 гишүүн, аймаг нийслэлийн Засаг дарга, ИТХ-ын дарга болон шийдвэр гаргах түвшний нийт 175 хүнд ил захидлыг олон улсын стандартад нийцсэн маягтын хамт  илгээсэн байна. Үүний хариуг УИХ-ын гишүүн Ч.Улаан, Н.Амарзаяа, Г.Занданшатар, М.Оюунчимэг нар  захидлын хариуг ирүүлж “Бид бенефициар өмчлөгч биш” гэж бусдыгаа манлайлан оролцож, хамтарч ажиллахаа илэрхийлсэн байна.   Бенефициар өмчлөгч гэдэг нь Олборлох үйлдвэрлэлийн ил тод байдлын санаачилга (ОҮИТБС)-ын хүрээнд “олборлох салбараас ашиг хүртэгч эцсийн өмчлөгч, эзэд”-ийг (цаашид бенефициар өмчлөгч гэх) хэлж буй ажээ. Ийм байдлаар захидал авсан 175 хүнээс 31  хүн хариугаа ирүүлж бусад нь ирүүлэхийг хүсээгүй байна. Аймаг, нийслэлийн удирдлах албан тушаалтай нийт 62 хүнээс 12 Засаг дарга, 13 ИТХ-ын дарга албан ёсоор бичгээр хариу ирүүлжээ.  Эдгээрээс Сэлэнгэ  аймгийн ИТХ-ын дарга өөрөө бус харин төрсөн хүүгээ “Уран Сэлэнгэ “ХХК-ийн хувьцааны 50 хувийг ийг эзэмшдэг, тус компанийн хөрөнгө оруулалтын 50 хувийг оруулсан гэж мэдүүлжээ. Цаашид АТГ-ын ХОМ-ийн мэдээллийг олон улсын стандартад нийцсэн маягтаар мэдээллийг нарийвчлан авах шаардлагатай гэдгийг тэд нэмж хэлсэн. Мөн хуульд эцсийн ашиг хүртэгч, эс хүртэгч, шууд болон шууд бусаар хүртэгч  гэдгээ ХОМ-т тусгаж байх нь зүйтэй гэж байв. Эх сурвалж:www.polit.mn