Ч.Гантулга

Гавьяат жүжигчин, дуучин С.Жавхлан өнөөдөр хэвлэлийн хурал хийлээ. Тэрээр Монгол Улсын Ерөнхийлөгч болон төр засагт хандан “Монгол дээлээ өмсч, хүндэлж мэддэггүй байж дан дээл, давхар дээл гэж үглэн, ам булаалдан ярих юм. Төрийн тэр хуульд нь дээл ямар хамаатай юм бэ. Монгол дээлийг ингэж гутааж, доромжилж болохгүй. Би долоон жил монгол дээлээ өмсөе гэж уриалж байгаа хүн. Гэтэл төр засгийнх нь зүгээс дээлээ тайлъя гэж уриалж болохгүй биз дээ. Давхар дээлээ тайлъя гэж жагсаал хийсэн Монгол ардын намын нөхдүүдээс би Монголын ард иргэдийн өмнөөс хариуцлага тооцмоор байна. Дээл өмссөн байдлыг нь харвал монгол хүн гэж хэлэхэд ичмээр. Ядаж дээлээ зөв өмсч сурчихаад дээлний тухай ярих хэрэгтэй. Энэ зохисгүй үйлдлийнхээ төлөө тус намын гишүүд болон Монгол Улсын Ерөнхийлөгч ард түмнээсээ албан ёсоор уучлалт гуйх ёстой” гэж хэлсэн юм. Мөн дуучин маань төрийн хууль, хэрүүлдээ “дээл” гэсэн үгийг оруулахаа болъё гэж уриаллаа. Тэрээр маргааш өглөө есөн цагт эзэн Чингисийн талбайд дээлтэй залуусыг хүрэлцэн ирэхийг урьсан юм. “Монголын төр нь дээлээ хайрлаж, хүндэлдэггүй юм бол маргааш тэдэнд монгол уламжлал, үндэсний хувцсаа дээдэлдэг ухамсарт залуус Монголд байгаа гэдгийг харуулах болно” гэж мэдэгдлээ.    Эх сурвалж www.polit.mn