Ч.ОЛДОХ Хотын дарга Су.Батболд албан тушаалаа урвуулан ашиглаж,  газар наймаалцсан байж болзошгүй баримтыг  шалгуулахаар  хуульч Г.Нацагдорж  АТГ-т хандлаа. Уг газар нь Хан-Уул дүүргийн  газар нутаг, Яармагийн V  хороонд байрлалтай, нийт  70 газар юм.  Энэ газрыг  “Макс групп”-ын  хувьцаа эзэмшигч, Улсын тод манлай уяач Д.Ганбаатар  2000 онд морин тойруулга барьж ашиглах зориулалтаар өөрийн нэр дээр авчээ. Энэ хугацаанд тэрээр газрын төлбөрөө төлж байгаагүй, газар эзэмших эрхийн хугацаа нь дууссан атал холбогдох газруудад хандаж байгаагүй, газрыг зориулалтын дагуу ашиглаагүй  зэрэг зөрчлийг гаргаж байж. Иймд  дээрх 70  га  газрынх нь  эзэмших эрхийн хугацаа  2015 онд дуусгавар болжээ. Д.Ганбаатар мөн энэ хугацаанд “Миний газарт  бусдад  газар эзэмшүүлжээ” хэмээн Захиргааны хэргийн шүүхэд хандсан ч  шүүхээс түүний газар эзэмших эрхийг хүчингүй болгосон бөгөөд түүний газар эзэмших эрх нь  2010 онд  дуусгавар болсныг тогтоожээ. Ийм байтал  Нийслэлийн Засаг дарга  Су.Батболд 70 га газрыг нь 54 га болгон багасгасан захирамжийг 2017 онд гаргаж, өөрийн шадар туслахад  2.2 га, иргэн Б.Оюун-Эрдэнэд 2.2 га, нийт 4.4 газрыг олгосон байна. Түүнчлэн Д.Ганбаатарын газар эзэмших эрхийн хугацаа дууссан байтал 54 га болгон буцааж олгосон зэрэг нь  ашиг сонирхлын  зөрчилтэй гэж  хуульч, өмгөөлөгч Г.Нацагдорж мэдэгдсэн юм.   АТГ-т шалгуулах үндэслэлүүд: -Хотын дарга Су.Батболд нь газар эзэмших эрхийн хугацаа дууссан байсан  70 га газраас  54.1 га газрыг Дагвадорж овогтой Ганбаатарын нэр дээр буцаан гарган өгч, үлдсэн 15.9 га газраас нь 2.2 га газрыг өөрийн шадар туслах Э.Анарын нэр дээр, 2.2 га газрыг нь өөрийн хамаарал бүхий байж болзошгүй иргэн Б.Оюун- Эрдэнийн нэр дээр тус, тус гаргажээ. Иргэн Э.Анар нь 25 настай бол иргэн Б.Оюун- эрдэнэ нь 28 настай юм  байна. -Эдгээр газруудыг Су.Батболд нь 2018 оны А/726 тоот буюу нэг тушаалаар, нэг өдөр олгожээ. -А/726 тоот захирамж нь нийслэлийн вэб сайтад байхгүй, хайгаад олдохгүй байгаа. -Э.Анар нь одоо С.Батболдын шадар туслах хийдэг, төрийн албан хөөгч бөгөөд ямар үндэслэлээр ийм их хэмжээний газар авсан болохыг мөн Су.Батболд нь Д.Ганбаатарт газар олгохдоо яагаад тодорхой хэсгийг таслан авч өөрийн хамаарал бүхий этгээдийн нэр дээр гаргасан болохыг шалгах шаардлагатай. -Э.Анар нь Су.Батболдын төрсөн ах Энхболдын хүүхэд байх магадлалтай. -Түүнчлэн Д.Ганбаатар нь газраа буцаан авах зорилгоор тодорхой хэсгийг Су.Батболдын хамаарал бүхий этгээдүүдэд өгсөн нь авлигын шинжтэй байж болзошгүй. Эх сурвалж: www.polit.mn