С.УЯНГА

Он гарсаар 14 аймгийн 48 суманд 66 удаагийн ой, хээрийн түймэр гарсан нь өнгөрсөн жилтэй харьцуулахад ой, хээрийн түймэр 10 дахин өсчээ. Энэ талаар ОБЕГ-ын олон нийттэй харилцах хэлтсийн ахлах мэргэжилтэн  Б.Дуламсүрэнгээс  тодрууллаа.

-Энэ жил хуурайшилт ихтэй байгаа учраас гал түймэр их гарч байна. Өнгөрсөн амралтын өдрүүдэд дуудлага хэр байв?

-Амралтын өдрүүдэд ой, хээрийн түймэр гурван аймгийн найман сумын нутагт гарсан. Онцгой байдлын албаны 89 албан хаагч, арван автомашин, орон нутгийн 582 иргэн, 63 автомашинтайгаар түймрийг унтраах ажиллагаанд оролцлоо. Өвөл ихэнх нутгаар цас бага орсон,  дулаан, хуурайшилт ихтэй байгаагаас ой, хээрийн түймэр их гарч байна.

-Гал түймрээс болж хүний амь эрсдэх зэрэг тохиолдол гарсан уу?

Дорнод аймгийн гурван суманд түймэр гарч зарим сумдын нутагт тархсан байсан. Баяндун суманд түймрийн үеэр 24-53 насны таван хүн түлэгдэж аймгийн нэгд­сэн эмнэлэгт эмчлүүлж байна. Мөн үнс нурмаа ил задгай асгаснаас түймэр гарч  53 настай эрэгтэй нас барсан харамсалтай хэрэг гарсан. Тиймээс иргэд ой хээрийн түймрээс урьдчилан сэргийлж, анхаарал болгоомжтой байхыг анхааруулж байна. Булган, Хэнтий аймгуудад ой хээрийн түймэр гарч Онцгой байдлын албан хаагчид нутгийн иргэдтэй хамт­ран шуурхай унтраа­сан. Цаг агаарын урьд­чилсан мэдээгээр дөрөв, тавдугаар сар хуурайшилт ихтэй, хүчтэй салхи шуургатай байх төлөвтэй байгаа учраас  иргэд асаасан гал, шүдэнз, татсан тамхиа бүрэн унтраах, ил задгай гал түлэхгүй байх, үнс нурмаа ухсан нүх, тагтай битүү саванд хийж занших хэрэгтэй байна.