Ч.ЗОТОЛ БСШУС-ын сайд Ц.Цогзолмаа, Батлан  хамгаалахын сайд Н.Энхболд нар өнөөдөр Батлан хамгаалах яамны дэргэдэх “Цоглог” хүүхдийн цэцэрлэгийн хичээлийн шинэ жилийн бэлтгэлтэй танилцлаа. Батлан хамгаалах яамны офицер, ахлагч, ажилчдын хүүхдүүдэд зориулсан энэхүү цэцэрлэгийг тус яам өөрийн нөөц бололцоонд тулгуурлан өөр зориулалтаар ашиглаж байсан төрийн өмчит барилгыг засч тохижуулан байгуулжээ. Нийт дөрвөн бүлэгт 120 хүүхэд хүлээн авах хүчин чадалтай уг цэцэрлэг Баянзүрх дүүргийн 115 дугаар цэцэрлэгийн нэг салбар болж үйл ажиллагаа явуулах юм байна. БСШУС-ын сайд Ц.Цогзолмаа “Цоглог” цэцэрлэгийн хичээлийн шинэ жилийн бэлтгэлтэй танилцах үеэрээ “Сургуулийн өмнөх боловсролд хүүхэд бүрийг хамруулах талаар Засгийн газрын 2016-2020 онд хэрэгжүүлэх мөрийн хөтөлбөрт туссан. Хөрөнгө, санхүү хүрэлцээгүйгээс болоод сургуулийн өмнөх боловсролд хүүхэд бүрийг хамруулах боломж хомс байгаа энэ үед Батлан хамгаалахын сайд шийдвэр гаргаж, иж бүрэн цэцэрлэгийн барилгыг засч тохижуулан хүүхдүүдээ хүлээн авахад бэлэн болсон байна. Энэ бол яамны ажилтнуудынхаа нийгмийн асуудлыг шийдэхэд бодит дэмжлэг болсон төдийгүй Засгийн газрын мөрийн хөтөлбөрийг хэрэгжүүлэхэд чиглэсэн бүтээлч ажил болжээ” хэмээн онцоллоо. Мөн тэрээр БХЯ-ын дэргэдэх “Цоглог” цэцэрлэгт хүүхдэд ээлтэй орчин бий болгоход шаардлагатай тоног, төхөөрөмж, сургалтын хэрэгслүүдээр дэмжлэг үзүүлэхээ амалсан юм. Төрийн албан хаагчдын нийгмийн асуудлыг шийдвэрлэх хүрээнд өмнө нь ХЗДХЯ болон Гадаад харилцааны яам дэргэдээ хүүхдийн цэцэрлэг байгуулан ажиллуулж байгаа ажээ.   Эх сурвалж: www.polit.mn