Ч.ЗОТОЛ Монголын Ардчилсан оюутны холбоо /МАОХ/-ноос сургалтын төлбөрөө үндэслэлгүй нэмсэн асуудлаар төрийн болон хувийн хэвшлийн   их, дээд сургуулиудын удирдлагуудад шаардлага  хүргүүллээ. Тэд найман зүйл бүхий шаардлага хүргүүлсэн бөгөөд үзүүлэлтийг гаргахад судалгаанд суурилсан гэдгээ онцлов. Өнөөдөр манай улсын хэмжээнд нийт 96 их, дээд сургуульд  150 мянга гаруй оюутан суралцдаг. Жил ирэх бүр сургалтын төлбөр үндэслэлгүйгээр нэмэгдэж, эцэг, эхчүүд төдийгүй оюутан залууст дарамт учруулж байгаа нь нууц биш. 2018-2019 оны хичээлийн жилд МУИС 11.900-19.200 төгрөгөөр, ШУТИС 12.000 төгрөгөөр тус тус нэг кредит цагийн төлбөрөө нэмэгдүүлсэн  бол  МУИС хамгийн их буюу 69.6 хувиар нэмэгдүүлсэн байжээ. Түүнчлэн ХААИС 19.5 хувь, АШУҮИС 14.5 хувь, БХИС 80.6 хувь, СУИС 45.8 хувь, МУБИС 50.1 хувиар тус тус сургалтын төлбөрөө нэмэгдүүлсэн үзүүлэлттэй  гарчээ. Түүнчлэн жил бүр  15 мянган оюутан дотуур байранд амьдрах хүсэлт гаргадаг бөгөөд сургалтын төлбөрийг дагаж үнэ нь нэмэгддэг. Их, дээд сургуулийн нэгдүгээр курст элсэгчдийг эрүүл мэндийн үзлэгт заавал хамруулдаг бөгөөд үнэ, тарифын тогтсон стандартгүй нь мөнгө татах далд  хэлбэрийн нэг болдог. Сургалтын төлбөр, дотуур байрны зардал ийнхүү өсдөг ч эргээд сургалтын чанар, хичээлийн орчин дотуур байрны орчны тав тух, түүнчлэн багш ажилчдынх нь цалин нэмэгддэггүй. Их,дээд сургуулийн томоохон албан тушаалуудад улс төрийн намын хүмүүс томилогддог бөгөөд боловсролын чанарт анхаардаггүй. Түүнчлэн өнгөрсөн хугацаанд иргэдийн цалин хөлс  нэмэгдээгүй,  хөдөлмөрийн хөлсний доод хэмжээ 240 мянга байгаа атал  их, дээд сургуулийн сургалтын дундаж төлбөр 2.6 сая байгаа нь харьцангуй үзүүлэлт болохыг МАОХ-ноос шаардлагадаа онцлон  тэмдэглэжээ. Эх сурвалж: www.polit.mn