Т.МӨНГӨНЗУЛ Дөрвөн жилд нэг удаа болдог XVIII дугаар Азийн зуны спортын наадам энэ сарын 18-наас ирэх сарын 02-ны өдрүүдэд Индонез улсын Жакарта, Палембан хотуудад болно. Энэ удаагийн “Жакарта-Палембан 2018” наадамд Ази тивийн 45 орны 10000 гаруй тамирчид 40 төрлийн спортын 465 багц медалийн төлөө хурд хүч, авхаалж самбаа, тэсвэр тэвчээрээ сорин өрсөлдөх билээ. Энэ нь Азийн наадмын түүхэн дэх хамгийн олон улс, болон спортын төрөлтэй наадам болж байгаа юм. Тэгвэл тус наадамд эх орноо төлөөлөн оролцох тамирчдад хүндэтгэл үзүүлэх ёслол Спортын төв ордонд боллоо. Манай улсын хувьд энэ жил 30 төрөлд 269 тамирчин оролцох юм. Ёслолын ажиллагаанд БСШУС-ын дэд сайд Г.Ганбаяр,   МҮОХ-ын Ерөнхийлөгч Д.Загдарсүрэн, Ерөнхий нарийн бичгийн дарга Э.Бадар-ууган болон тамирчдын төлөөлөл оролцсон юм. Дэд сайд Г.Ганбаяр Монгол улс Азийн наадамд 1974 оноос хойш  оролцож, 20 алт,37 мөнгө, 80 хүрэл нийт 137 медаль хүртээд буйг онцлоод баг тамирчдад амжилт хүслээ. Талбайн теннисний холбооны шигшээ багийн дасгалжуулагч С.Сүхжаргал “Энэ жил бид талбайн теннисээр анхны медалаа авна гэдэгтээ илтгэлтэй байна” гэсэн юм. Талбайн теннисийн шигшээ багт таван эрэгтэй, гурван эмэгтэй тамирчин багтжээ. Харин Гольфийн төрөлд оролцож байгаа тамирчин А.Энэрэл “Тэмцээнд оролцох тамирчдыг сорилго тэмцээнд гаргасан амжилтаар нь шалгаруулж авсан. Бид энэ жил бэлтгэлээ сайн хийсэн. Зун талбай дээр бэлтгэл хийх боломжтой байдаг. Харин өвөл дасгалаа хийж, техникээ сайжруулах тал дээр түлхүү анхаардаг” гэсэн юм. Эх сурвалж: www.polit.mn