Б.ЗАЯА

Гудамжинд хэв журам сахиулж буй албан хаагчдын өнгөрсөн баасан гаригаас сольсон шинэ өмсгөл нь тэднийг “жуулчин, загасчин, анчин” гэж цоллуулахад хүргэлээ. Нөгөө талаар үндэсний үйлдвэрлэлээ дэмжсэнгүй, нэлээдгүй хөрөнгөөр санхүүжүүлсэн гэж шүүмжлээд байна.

Цагдаагийн албан хаагчдын шинэ хувцасны загварыг Ерөнхийлөгч өнгөрсөн оны есдүгээр сард 149 дүгээр тогтоолоор баталжээ. 2013 онд цагдаагийн албан хаагчдын хувцсанд зориулж 5.5 тэрбум төгрөг улсаас төсөвлөсөн юм байна. Энэ удаагийн хувцсанд 3.5 тэрбум төгрөг төсөвлөж, худалдан авах ажиллагааны үр дүнд гаднын олон улсыг судалснаас Турк улсыг сонгожээ. Дотоодын үйлдвэрлэгчдээ дэмжиж томоохон оёдлын үйлдвэрийн эздийг уг ажилд урьсан гэнэ. Өнгөрсөн жил манайхан сурагчийн шинэ дүрэмт хувцасны үйлдвэрлэл явуулах үед шинэ хувцас үйлдвэрлэх санал давхцаж, оёдлын үйлдвэрүүд “Ачаалалтай байна, 2014 оны нэгдүгээр улирлын сүүлчээс нийлүүлж болох юм” гэсэн хариуг өгчээ. Түүнчлэн төсөвт өртөг нь өндөр байсныг ЦЕГ-ын холбогдох мэргэжилтнүүд хэллээ. Тиймээс Турк улсыг сонгож төсөвт өртөгтөө тааруулж цагдаагийн 8000 гаруй албан хаагчдын хавар, зун, намрын гадна хослол, бүрх малгай, футболк, гутлыг захиалжээ. Түүнчлэн цөөн тооны өвлийн хувцас ч ирсэн гэнэ. Өмнөх загварын хувцсыг албан хаагчдад тарааж дууссан юм байна. Өмнө нь нэг цагдаад ногдох дөрвөн улирал, ёслол хүндэтгэл, оффисын зэрэг иж бүрэн хувцас 1.2 сая төгрөгийн үнэтэй байсан бөгөөд энэ удаад ч энэ өртгөө барьжээ.