Б.ЭНХ

Хачигнаас гаралтай халдварт өвчний дэгдэлт хаврын улиралд нэмэгддэг байна. Энэ тухай ХӨСҮТ-ийн Сургалт, хэвлэл мэдээллийн албаны дарга Ч.Уртнасангаас тодрууллаа.

-Эрсдэлтэй халдварт өвчнүүдийн нэг нь хачигнаас үүсдэг өвчин гэдэг. Энэ өвчний халдвар ялангуяа хаврын улиралд нэмэгддэг гэсэн үү?

-Байгалийн голомтот энэхүү халдварт өвчин дөрөв, тав, зургадугаар сард дэгдэлт нь өндөр байдаг. Өөрөөр хэлбэл, эдгээр улиралд хачиг их буудаг. Сүүлийн жилүүдэд хачигнаас үүсдэг халдварт өвчин нэмэгдэх болсон. Гол бүс нь ой модтой аймгууд тэр дундаа Сэлэнгэ аймгийн Бугат сум.

-Дулааны улиралд иргэд аялал зугаалга, оюутнууд дадлагын ажил хийхээр ой модыг зорих нь олонтаа. Тэдэнд халдвараас сэргийлэх мэдээллийг өгөхгүй юу?

-Ер нь тухайн орон нутгийн хүмүүс халдвар авах нь бага. Өвчний талаарх мэдээлэлтэй байдаг. Харин явуулын хүмүүс, таны хэлдгээр оюутан, амралт зугаалгаар явах иргэд халдвар авах өндөр эрсдэлтэй. Тиймээс энэ тухай мэдээллийг тухайн бүс нутагт сэрэмжлүүлсэн таних тэмдэг, самбар байршуулах нь зүйтэй.

-Танайхаас өвчний эсрэг вакцинжуулалт хийдэг үү?

-Ой модон дунд байнга ажилладаг ойн цэвэрлэгч, хамгаалагч, мод бэлтгэдэг хүмүүст улирлын чанартай вакциныг тухайн орон нутгийн эрүүл мэндийн байгууллагууд хийдэг.