Ч.ГАНТУЛГА

“Хобби” булангийнхаа энэ удаагийн зочноор Урчуудын эвлэлийн шагналт зураач Д.Уртнасанг урилаа. Тэрээр дэлхийд алдартай рок хамтлагуудын пянзыг цуглуулдаг ажээ.

Зураач Д.Уртнасан багаасаа рок хөгжим сонсож өсчээ. Түүний зургууд этгээд, өвөрмөц байдаг нь хөгжмөөс үүдэлтэй гэв. Харин түүнд 600 гаруй пянз бий. Тэдгээрийн ихэнх нь 1960-1970 оны үед нэрд гарсан рокруудынх. Зураачийг бага байхад алдарт “The Beatles”, “Kiss”, “Pink Floyd”, “Queen”, “Rolling Stones”, “Bee Gees” зэрэг хамтлагуудын уран бүтээлийн оргил үе таарчээ. Байрны ах нараараа гитар заалгаад, алдартай хамтлагуудыг дууриаж үсээ ургуулан, найзуудтайгаа шүтдэг хамтлагийнхаа тухай ярьдаг байсан гэж зураач Д.Уртнасан дурссан юм. Харин түүний цуглуулгын хамгийн нандин нь “Pink Floyd” хамтлагийн хуучин пянз ажээ. Анх 1973 онд тэр пянзыг олчихоод бөөн баяр болж байсан гэнэ. Олон хүний гар дамжсан учир хуучирч зурагдсан байсан ч тухайн үед “Pink Floyd” хамтлагийн пянзтай хүн жинхэнэ “од” болдог байсан гэнэ. Харин хамгийн сонирхолтой нь түүнд 1980 онд авчихаад огт задлаагүй пянз олон байдаг. Зураачаас авчихаад задалж, сонсох хүсэл төрдөггүй юмуу гэж асуухад “Пянзыг хичнээн үнэтэй, эрхэм гэдгийг мэддэг. Бас түүнийг ямар үнэ цэнээр олж авдагаа бодохоор задлах зориг хүрдэггүй” гэж хариулсан юм. Түүнд “Битлз” хамтлагийн тоглолтын бүх пянз бий. Түүнээс гадна зураачид маань Эльвис Преслигийн зургаан алтан пянз байдаг ажээ. Дэлхий нийтээр 1000 хувь хэвлэгдсэний 132 дахийг нь тэрээр авч чаджээ. Алтан пянзны тухай “Дахиад хэзээ ч хэвлэгдэхгүй учир урлагийн үнэт өв, түүх болоод үлдэнэ шүү дээ” гэв. Харин оргиналь пянзны хамгийн доод талын үнэ нь 120 еврогоос эхэлдэг гэнэ. Эдгээр 600 пянз түүний хоёр дахь цуглуулга юм байна. Өмнө 400 гаруй хуучны пянз­тай байсан боловч амьдрахын эрхэнд зарж байрныхаа тал төлбөрийг хийж байжээ. Гэхдээ тэр байранд нь хүүхдүүд нь мэндэлсэн учир пянзныхаа араас хэзээ ч харамсч байгаагүй гэсэн.