Т.БАТСАЙХАН

Монголын “Цахилгаан тээвэр” компанийн дарга асан Д.Жаргалсайхантай ярилцлаа.

-Таныг “Цахилгаан тээвэр” компанийг хөл дээр нь босгосон хүн хэмээн зарим нэг нь магтдаг. Гэтэл яагаад ажлаас чөлөөлөгдөх өргөдлөө өгсөн юм бэ?

-Манай салбарынхан сүүлийн арван жил тогтвор сууршилтай, зорилго тэмүүлэлтэй ажиллаж ирлээ. Ард түмэнд хямд үнэтэй, орчин үеийн хийц загвар бүхий, агаар бохирдуулдаггүй нийтийн тээврийн үйлчилгээг сэргээн хүргэж чадсан. Гэтэл “Цахилгаан тээвэр” компанийг дампууруулж, “Автобус-II” компанийн адилаар хувьчлана гэж олон хүн улайран дайрч байлаа.  Тэр хүмүүсийн амин хувийн өчүүхэн эрх ашгийг сөрж зогссоноороо олон дарамт, шахалтыг үзсэн дээ. Тэгээд ч өндөр технологийн машинт үйлдвэрлэлийн шинэ салбар нь хувийн хэвшил дээр тулгуурлан цаашид хөгжих ёстой гэж бодлоо. Төрийн компани дээр үйлдвэрлэл явуулахад ямар их зовлон бэрхшээл, дарамттай байдгийг яс махаараа мэдэрсэн. Тиймээс ажлаасаа өөрийн саналаар чөлөөлөгдсөн юм.

-Одоо тэгэхээр “Цахилгаан тээвэр” компани троллейбусын үйлдвэрлэлээ зогсоосон гэсэн үг үү?

-Тийм ээ. Зам тээврийн яам, Нийслэлийн удирдлага, Нийслэлийн аудитын газраас нийтийн тээврийн үйлчилгээ, үйлдвэрлэл хоёр нэг компани дээр зэрэгцэн байж болохгүй гэсэн чиглэл өгсөн. Тиймээс би үйлдвэрлэлээ сонгосон. Цахилгаан тээвэр компани дээр өрнөж байсан цахилгаан машин үйлдвэрлэлийн ажил ч зогсож байгаа. Өнгөрсөн хугацаанд улс, нийслэлийн төсвөөс 8.2 тэрбум төгрөгний хөрөнгө оруулалтаар 66 ширхэг таван загварын цахилгаан тээврийн хэрэгсэл үйлдвэрлэсэн.

-Таныг холбоо байгуулсан гэж сонссон. Танай холбоо тэгэхээр машин үйлдвэрлэлийн чиглэлээр ажиллах юм байна?

- Ашиглалтын гүйлт нормоо 2-3 дахин өндөр явчихсан хуучин троллейбустай байхдаа өдөр бүр л загнуулж, дээрэлхүүлэн доромжуулж явсан минь шинэ технологийн орчин үеийн хийцтэй, тэжээлийн олон систем бүхий цахилгаан машинууд бүтээх эрч хүчийг өгч байсан. Саяхан Төмөрлөг машин үйлдвэрлэлийн үндэсний холбоо байгууллаа. Холбооны ажлаа эрчимжүүлэх, хүнд аж үйлдвэр хөгжих хууль эрх зүй, бизнесийн орчин бүрдүүлэх, өндөр технологийн машинт үйлдвэрлэлийн шинэ салбар руу хөрөнгө оруулагч нарыг татах зэрэгт сэтгэл гарган ажиллах болно. Мөн бүс нутгийн машинт үйлдвэрлэлийн интеграцид монголчууд бүтээгдэхүүн болон технологи, техникийн баримт бичгийн аусортингоор нэгдэх боломжийг нээх гээд олон ажил төлөвлөсөн.

-Металлург, машинт үйлдвэрлэлийн цоо шинэ хөгжлийн салбар бий болгоно гэж хамгийн их ярьдаг хүн та. Бид техник технологийн өндөр нарийвчлалтай мега төслүүд хэрэгжүүлснээр юуг хожих вэ?

-Тал нутгаа урж сүйтгэхээс илүүтэй тархи оюунаа дайчилсан техник технологийн мега төслүүдийг хэрэгжүүлж чадвал бидний ирээдүй баталгаажна. Монгол үндэстний дахин сэргэлтийн суурийг тавих түүхийн энэ торгон агшинд бид бүхэн эв нэгдлээ хамгаалж улс үндэстнээ хөгжүүлэх нэгэн зорилгын доор нэгдэх ёстой. Улс үндэстний хөгжлийн нүүдлийг алслан харж чадах ухааны болон билгийн нүд нь нээгдсэн шинэ үеийн монголчууд сэрж байгаа нь зөв гольдролдоо орсон жам ёсны хөгжил ирэх итгэл төрүүлж байна. Өнөөдөр цахилгаан тээврийн үйлчилгээний давуу талыг нийгэм ойлгож, бараг хүн бүрийн амнаас метро барина гэсэн үг гарч эхэлсэнд мэргэжлийн хүний хувьд баяртай байна.