С.САРУУЛ Монгол Улс дахь Эмпати сургуулийн удирдлагууд Туркад төрийн эргэлт хийхэд оролцсон хэмээн үзэж тус улсын Засгийн газар болон Монгол Улсад суугаа Элчин сайдын яамнаас Монгол дахь Турк, Монголын хамтарсан сургуулиудын 2017 оны төгсөгчдийн дипломыг хүлээн зөвшөөрөхгүй байх шийдвэр гаргасан гэдгийг удаа дараа мэдэгдээд байгаа. Манай улсад үйл ажиллагаа явуулж буй Монгол, Туркийн хамтарсан “Эмпати” сургууль таван салбартай.  Улаанбаатар-Эмпати, Мон-Турк, Дархан, Эрдэнэт, Баян-Өлгий аймагт Турк, Монголын хамтарсан сургууль бий. Энэ таван сургуульд ойролцоогоор 2000-гаад хүүхэд суралцдаг. Харин 2017 онд 270 хүүхэд төгсжээ. Дээрх маргаан сүүлийн 3-4 жилийн үргэлжилж байгаа бөгөөд саяхан Туркийн иргэн, Эмпати сургуулийн захирал  Вейсел Акчайг гэрийнх нь гаднаас хулгайлах гэсэн үйл явдал болсон юм. Тэгвэл үүнтэй холбоотойгоор өчигдөр  /2018.08.06/ Монгол дахь Турк улсын Элчин сайдын яамнаас байр сууриа илэрхийллээ. Энэ үеэр тус улсаас манай улсад суугаа Элчин сайд М. Ахмет Язал “Монгол Улсад үйл ажиллагаа явуулж байгаа Турк сургуулиудын орлогоор терроризмыг санхүүжүүлж байгааг хүлээн зөвшөөрч болохгүй. Сургуулиудыг заавал хаана гэж байгаа юм биш. Үйл ажиллагаа, чиглэл буруу тийшээ явж байгаа учраас ялгаж салгах хэрэгтэй.  Эцсийн шийдвэрийг Монголын тал гаргана. Бусад улс оронд бол өөрийнхөө улс мэдэлд авах, Туркийн Боловсролын яаманд шилжүүлсэн тохиолдол бий. Хамгийн гол нь сурагчид, эцэг эхчүүдэд хохирох ёсгүй.  Сургуулиудын үйл ажиллагааг шилжүүлж террорист бүлэглэлээс салгасны дараа төгсөгчдийн дипломыг хүлээн зөвшөөрөх,  эрхийг нь сэргээх талаар ярилцаж болно” гэлээ. Эх сурвалж: www.polit.mn