Шатахууны үнийн асуудлаар Ерөнхий сайдад шаардлага хүргүүлсэн гэв АН-ын Бодлогын ерөнхий зөвлөл  ээлжит хуралдаанаа хийж, зарим асуудалд шийдэлд хүрчээ.  Энэ талаар  АН-ын дарга С.Эрдэнэ, Ерөнхий нарийн бичгийн дарга Ц.Туваан нар мэдээлэл хийлээ.  Намаас зохион байгуулсан “Иргэдээ сонсъё” аяны үеэр иргэдийн зүгээс хүүхдийн мөнгөтэй холбоотой асуудлыг ихээр тавьжээ. Улаанбаатар хотын иргэдийн дунд явуулсан санал, асуулгад оролцогчдын 92 хувь нь хүүхдийн мөнгийг бүх хүүхдэд тэгш олгох асуудал тавьсан байна.  Иргэдээс ирүүлсэн санал, шүүмжлэлийг АН-ын үндэсний бодлогын хорооны хуралдаанаар дүгнэн, эрх баригчид, шат шатны удирдлага, албан тушаалтанд шаардлага хүргүүлнэ гэв. Мөн Монгол Улс нийтдээ жилд 8-1400 сая долларын нефтийн бүтээгдэхүүн хэрэглэдэг. Үүний 90 гаруй хувийг “Роснефьт” компаниас авдаг. Үүнтэй холбогдуулан Ерөнхий сайдад шаардлага хүргүүлсэн. Шаардлагыг хүлээж авахгүй бол цаашид тэмцлийн хэлбэрийг сонгоно хэмээн АН-ын  удирдлагууд мэдэгдлээ.  Мөн энэ үеэр АН-ын дарга, УИХ-ын гишүүн С.Эрдэнэ “Ээлжит бус чуулганы асуудалд бид холбогдох байгууллага, албан тушаалтны шийдвэр гарахыг хүлээж байгаа. Ээлжит бус чуулган хуралдахыг  АН дэмжиж байна” гэлээ. МАН-ын Хяналтын хорооны дарга Д.Батбаатар мэдээлэл хийв. Хяналтын хорооны хуралдаж, хэ “60 тэрбумын бичлэг”-тэй нэр холбогдсон Ц.Сандуй, М.Энхболд, А.Ганбаатар нарт ёс зүйн хариуцлага тооцох эсэх асуудал байв. Энэ асуудлыг МАН-ын Ёс зүйн хорооноос оруулж ирээд, Хяналтын хороо эхний асуудал болгон хэлэлцсэн байна. Ингээд Ц.Сандуй, А.Ганбаатар нарыг Бага хурлын гишүүнээс чөлөөлөх тухай асуудлыг тавьжээ.    Харин УИХ-ын дарга М.Энхболдод ёс зүйн хариуцлага тооцох асуудлыг Удирдах зөвлөлд танилцуулна гэж МАН-ын Хяналтын хорооны дарга Д.Батбаатар хэллээ. Мөн тэрээр “60 тэрбумын бичлэг” дээр бичигдсэн яриа амьдрал дээр хэрэгжээгүй ч намын нэр хүндийг унагаасан эдгээр хүмүүст хариуцлага тооцох нь зүйтэй гэж үзсэн. Цаашид 60 тэрбумын бичлэгээр улс төр хийх нь явуургүй болсон гэдгийг онцолсон юм. Хоёрдугаарт, Ховд аймгийн Засаг даргын орлогч Ш.Батсүхийн нэр дээр ирсэн гомдлыг хэлэлцсэн байна. Ховд аймгийн намын хорооны 38 дугаар Бага хурал дээр Ш.Батсүх хэлэлцэж буй асуудлыг өөрт ашигтайгаар шийдүүлэхийн тулд намын гишүүдэд шан харамж амласан нь тэр дороо ил болжээ. Иймд Ш.Батсүхэд ёс зүйн хариуцлага тооцох, цаашид улс төрийн дэмжлэг үзүүлэхгүй байх, улс төрийн дэмжлэгээр олсон ажил албатай нь хариуцлага тооцох ёстой гэж үзжээ. Гуравдугаарт, УИХ-ын гишүүн асан Д.Гантулгатай холбоотой асуудлыг хэлэлцжээ. Д.Гантулгын нэр холбогдсон асуудал нь нийгмийн бухимдал төрүүлсэн. Иймд цаашид намын нийт гишүүд ёс зүй, сахилга хариуцлагатай байх тогтоолыг Хяналтын хорооноос гаргажээ.Дөрөвдүгээрт, намын гишүүдийнхээ сахилга хариуцлагыг дээшлүүлэх, нийслэлийн намын хорооны гишүүд эвтэй байж, хурлаа товлосон хугацаанд хийх гэх мэт дөрвөн заалтыг багтаасан тогтоол гаргажээ.

Д.Гантулгыг энэ сарын 17-нд шүүнэ

УИХ-ын гишүүн асан Д.Гантулгад холбогдох хэргийн урьдчилсан хэлэлцүүлэг өчигдөр Баянзүрх дүүргийн Эрүүгийн хэргийн анхан шатны шүүхэд болжээ. Тус хэлэлцүүлэгт нийслэлийн прокурор Н.Амарсанаа, яллагдагч Д.Гантулга, түүний өмгөөлөгч Г.Батбаяр, хохирогчийн өмгөөлөгч Э.Хашчулуун нар оролцсон байна. Шүүхийн урьдчилсан хэлэлцүүлэг долоон цаг үргэлжилжээ. Эцэст нь Д.Гантулгыг шүүгдэгчээр татаж, түүнд холбогдох хэрэгт гэм буруутай эсэхийг тогтоох шүүх хурлыг наймдугаар сарын 17-нд 10:00 цагт Баянзүрх дүүргийн Эрүүгийн хэргийн анхан шатны шүүхэд хийхээр шийдвэрлэсэн байна. УИХ-ын гишүүн асан Д.Гантулгыг Ч.Наранзаяа гэх эмэгтэйг хүчиндсэн гэх хэрэгт холбогдуулан, шалгаж байгааг ийнхүү шүүх хуралдаанаар шийдэх боллоо.