Э.ЦЭЦЭГ

ЭМЯ-ны дэргэдэх Эмнэлгийн мэргэжилтний ёс зүйн хяналтын хороо саяхан хуралдлаа. Уг хурлаар улсын нэгдүгээр амаржих газарт гарсан эхийн эндэгдэлд холбогдсон эмнэлгийн мэргэжилтнүүдийн ёс зүйн асуудлыг хэлэлцэж хариуцлага тооцлоо. Тухайлбал, иргэн Б-д эмнэлгийн тусламж, үйлчилгээ үзүүлэхдээ ёс зүйн ноцтой зөрчил гаргасан их эмч Н.Бадрах, А.Мөнхбилгүүн, Д.Соёл-Эрдэнэ, Ж.Эрдэнэчимэг нарын эмчлэх эрхийг гурван сараас нэг жил хүртэлх хугацаагаар хүчингүй болгох саналыг Эрүүл мэндийн сайдад хүргүүлэхээр шийдвэрлэв. Мөн энэ зөрчлийг судлах явцад эмнэлгийн мэргэжилтнүүд тусламж, үйлчилгээний стандарт, удирдамжийг чанд баримтлан ажилладаггүй, эрүүл мэндийн байгууллагуудад уг үйл ажиллагаанд тавих хяналт сул байгааг илрүүлжээ. Мөн эмч нарын зөвлөгөөний шийдвэрийг хууль, журамд заасны дагуу албан ёсоор баримтжуулдаггүй, тендерээр авсан эм, эмнэлгийн хэрэгсэл  нь шаардлага хангадаггүй зэрэг зөрчил илэрснийг бүх шатны байгууллагууд анхаарч ажиллахыг хатуу сануулсан юм. Цаашид эмнэлгийн мэргэжилтэн ёс зүйн болон мэргэжлийн алдаанд хүргэж болзошгүй ийм нөхцөл, шалтгааныг арилгах шаардлагатай гэдгийг ЭМЯ-нд уламжиллаа.