С.САРУУЛ

Монцамэ агентлаг, Нийслэлийн аялал жуулчлалын газартай хамтран ажиллах санамж бичигт өчигдөр гарын үсэг зурав. Энэ үеэр Нийслэлийн аялал жуулчлалын газрын дарга Э.Баттулгаас зарим асуултад хариулт авлаа.

-Хамтын ажиллагааны хүрээнд  ямар ажлуудыг хийх вэ?

- Аялал жуулчлал бол улс орныг хөгжүүлэх нэг хүчин зүйл юм. Хоёр байгууллагын хамтын ажиллагааны хүрээнд, нэн түрүүнд Улаанбаатар хотын аяллын маршрут, жуулчдад зориулсан халаасны ном гаргана. Өнөөдрөөс НАЖГ-ын бүтээсэн Улаанбаатар хотыг сурталчилсан  богино хэмжээний киног Ази, Номхон далайн орнуудын мэдээллийн агентлагуудын нэгдсэн сүлжээнд  байршуулна. Монцамэ агентлаг нь дэлхийн 33 орны 40 гаруй мэдээллийн агентлагтай хамтран ажилладаг учраас аялал жуулчлалыг хөгжүүлэхэд чухал хувь нэмэр оруулна гэж ойлгож байгаа.

-Манай улсад ирэх жуулчдын тоо өсөх хандлага байна юу?

- Манай улс жуулчдад хамгийн таагүй ханддаг арван орны нэгээр нэрлэгдсэний улмаас өнгөрсөн жил жуулчдын тоо 15 хувиар буурсан. Өмнөх онд манай улсад  475 мянган жуулчин ирсний 92 хувь нь Улаанбаатар хотод ирсэн. Тэдний 60 хувь нь Горхи тэрэлж, Хустайн нурууг үзэж сонирхдог. Хамгийн гол нь жуулчдад Монголын талаар эерэг мэдээлэл өгөх нь чухал. Тиймээс мэдээллийн урсгалаар дамжуулан эерэг ойлголт түгээх зорилготой байна.

-Жуулчдыг татахын тулд энэ онд ямар ажил төлөвлөсөн бэ?

-Манай улсын талаарх сэтгэлгээг эерэг болгохын тулд нийгэмд чиглэсэн “Найрсаг Улаанбаатар” хөтөлбөр боловсруулна. Мөн Гандангийн дэнжийг гар урлал шашны аялал жуулчлалын үйлчилгээ үзүүлдэг соёлын аялал жуулчлалын төв болгоно. Улаанбаатар хотын жуулчны гудамжны тохижилтын ажлыг эхлүүлэх гэж байна. Мөн  Улаанбаатар хотын аялал жуулчалын зорилтот зах зээл Зүүн хойд Азийн бүс нутгийн орнуудад чиглэсэн “Asias next hUP” маркетингийн компанит ажлыг эхлүүлнэ гээд төлөвлөсөн олон ажил байгаа.