Г.АРИУНЦЭЦЭГ “Дэлхийн хепатит”-ын өдрийг тохиолдуулан энэ сарын 26-27-нд “Хепатитыг илрүүлье, эмчилье” уриан дор зохион байгуулж байна. Дэлхий дахинд 325 сая хүн вирусын архаг халдвартай амьдарч байгаа талаар ДЭМБ-аас мэдээлсэн. Мөн жил бүр 1.3 сая хүн элэгний хатуурал, хорт хавдраар нас барж байна. Харин Монгол Улсын нийт хүн амын 10 гаруй хувь нь архаг халдвартайд тооцогддог аж. Түүнчлэн вирусын шалтгаантай өвчлөлийн улмаас өнгөрсөн онд 1614 хүн нас баржээ. Эрүүл мэндийн сайд Д.Сарангэрэл “2017 онд эхлүүлсэн “Элэг бүтэн Монгол” үндэсний хөтөлбөрийн хүрээнд 40-65 насны 350 мянга гаруй хүнийг шинжилгээнд хамруулсан. Үүнээс 31 мянган нь элэгний C, 21 мянга гаруй нь B вирустэй гэж оношлогдсон. Халдвар илэрсэн иргэдийн 75 хувийг эмийн эмчилгээнд хамруулж 60-100 хувийн хөнгөлөлт үзүүлсэн. Энэ зардлыг Эрүүл мэндийн даатгалын сангаас гаргасан” гэв. B, С вирусын халдвар нь элэгний хавдрын гол шалтгаан болдог. Тиймээс эрт илрүүлж, оношилж, эмчлэх нь олон хүний амийг аварна. Гэтэл элэгний хорт хавдрын 80 хувь нь хожуу шатандаа оношлогддог байна. Дашрамд дурдахад “Элэг бүтэн Монгол” үндэсний хөтөлбөрийн хүрээнд 2020 он гэхэд халдварын тархалтыг хязгаарлахыг зорьж буй. Нөгөөтэйгүүр С вирусын шинэ тохиолдлыг таслан зогсоож, элэгний архаг үрэвсэл, хатуурал, хорт хавдрын шалтгаант нас баралтыг бууруулах зорилт тавьжээ. Эх сурвалж: www.polit.mn