Л.Хэрлэн

 Ерөнхийлөгч Ц.Элбэгдоржийн Японы эмнэлэгт хийлгэсэн   нурууны мэс засал амжилттай болсон, биеийн байдал сайн байгаа гэсэн мэдээллийг ойрын эх сурвалжууд нь хэлж байна.

Төрийн тэргүүнийг мэс засалд орох тухай  албан ёсны тайлбарыг Ерөнхийлөгчийн эмч, Анагаах ухааны доктор, дэд профессор Ө.Цолмон гуравдугаар сарын 11-нд өгч байснаар бол "Ерөнхийлөгчийн биеийн байдал сайн байгаа. Намар НҮБ-ын хуралд оролцох үедээ нарийн шинжилгээ хийлгэхэд нуруундаа эмчилгээ хийлгэх шаардлагатай гэсэн онош гарсан. Нуруу нугасны мэс засал нь дотроо олон төрөл, хүнд мэс заслуудын тоонд ордог. Ерөнхийлөгчийн онош бол гадаадад эмчлүүлэх өвчний жагсаалтад багтдаг. Заавал мэс заслын аргаар эмчлэгддэг өвчин учраас Монгол Улсын Ерөнхийлөгчийн эмчилгээг Япон улсад хийлгэхээр төлөвлөж байна” хэмээж байсан юм. Тэгвэл өчигдөр өглөө  хагалгаанд  орж, амжилттай болсон байна. Монголоос Тэргүүн хатагтайн хамтаар Ерөнхийлөгчийн ах нар очсон байна. Энэ талаар Ерөнхийлөгчийн Тамгын газраас албан ёсны мэдээлэл өгсөнгүй. Харин ойрын эх сурвалжууд Төрийн тэргүүний  бие сайн байгааг хэлж байгаа юм.