Л.САЙХАНСАНАА Урлаг биднийг тайвшруулж, мэдрэхүйд таашаал төрүүлэхээс гадна өвчнөө даван туулах сэтгэлийн тэнхээ, хүсэл эрмэлзэл өгч болохыг тэртээ 1905 онд алдарт сэтгэл зүйч Зигмунд Фройд анх олжээ. Мориноос айх сэтгэлзүйн эмгэгтэй 13 настай өвчтөн дээр анхлан урлагаар анагаахуй  /art therapy /эмчилгээг туршсан бөгөөд хүү өөрийн айдас зэрэг сэтгэлийг нь зовоож буй зүйлсийг зурагт дүрсэлж эхэлснээр айдсаа даван туулснаар энэхүү сэтгэл засах арга анагаах ухаанд дэлгэрчээ.  Өвчтөний сэтгэл зүйг тогтворжуулж, тэдэнд өвчнөө даван туулах хүсэл эрмэлзэл, өөртөө итгэх итгэлийг дэмжих зорилготойгоор “АНУ-ын Хоспитал Арт” сангийн сайн дурын ажилтнууд Монголын Урлагийн Зөвлөлтэй хамтран Монголд хоёр дахь удаагаа урлагаар анагаах эмчилгээний аргыг нэвтрүүлэхээр “Өнгөт Өдөр” төслийг амжилттай хэрэгжүүлж байна. Урлагаар Анагаах сургалт нь  энэ 16-наас 18-ныг хүртэл Хавдар Судлалын Үндэсний Төв, П.Н.Шастины нэрэмжит Улсын 3-р Төв Эмнэлэг болон Сэтгэцийн Эрүүл Мэндийн Үндэсний Төв гэсэн гурван эмнэлэгт ээлжлэн зохион байгуулагдах юм. “Хоспитал Арт” сан энэхүү эмчилгээг танилцуулахаар 2014 онд анх айлчлахдаа П.Н.Шастины нэрэмжит Улсын 3-р Төв Эмнэлэгт хэвтэн эмчлүүлж буй 40 эмчлүүлэгч, эмнэлгийн ажилтныг урлагаар анагаах сургалтад хамруулан, дөрвөн хамтын уран бүтээлийг туурвижээ. Тэдний зурсан зургийг өдөрт дунджаар тус эмнэлгээр үйлчлүүлж буй 400 хүн үзэж сонирхдог байна. Монгол Урлагийн Зөвлөлийн гүйцэтгэх захирал О.Одгэрэл “Бидний зорилго бол монголын соёл урлагын тогтвортой хөгжлийг хангах, соёлыг өвийг хамгаалахад дэмжлэг үзүүлэх юм” хэмээгээд өөрсдийн хэрэгжүүлсэн бусад төслийн тухай танилцуулсан юм. Тухайлбал, “Улаанбаатар” Олон Улсын кино наадам, “Улаанбаатар” Олон Улсын Медиа наадам болон таван сард зохион байгуулагдсан “Мошен Медиа” Олон Улсын бүжгийн наадмыг амжиллтай зохион байгуулжээ. Тус зөвлөл үйл ажиллгааныхаа хүрээнд урлагийн хөтөлбөр, урлагийн боловсролын хөтөлбөр, соёлын өвийн хөтөлбөр, хөгжлийн хөтөлбөр гэсэн дөрвөн чиглэлээр ажилладаг байна.  О.Одгэрэл “Урлагийн боловсролын хөтөлбөрийн хүрээнд “Өнгөт Өдөр” төслийг бид хоёр дахь жилдээ зохион байгуулж байна. Урлагаар анагаах сургалтад оролцогчдоос өмнө болон сүүлд судалгаа авахаар СЭМҮТ-ийн судалгааны багтай хамтран ажиллаж байна. Манай улсад урлагаар дамжуулж сэтгэл зүйг эмчлэх аргын тухай судалгааны ажил хийж байгаагүй энэ удаа судалгаа явуулж байгаагаараа өмнөх удаагийн төслөөс илүү үр дүнтэй болно гэж бид бодож байгаа” хэмээв. Тэрээр мөн урлагаар анагаах эмчилгээний аргыг Монголын эмнэлгүүдэд хэрэгжүүлэхээр цаашид зорьж ажиллана гэдгээ мэдэгдлээ. Эх сурвалж:www.polit.mn