Б.ДАМДИН-ОЧИР

Хотын дарга нар нэг ажил хийх гэж байгаа бололтой . Тэр нь “Хар жагсаалт” гээчийг гаргаж, түүндээ өмнөх засгийн үеийнхээ баахан тендерийн асуудлыг дэлгэхээр болсон гэнэ. Зам, барилгын ажлаас мөнгө унагадаг компани, аж ахуйн нэгжүүд болон албан тушаалтнуудыг энэхүү жагсаалтдаа бичнэ хэмээн нийтэд зарлаад эхлэв.

Дэлгэрүүлбэл, нийслэлийн газар нутагт, нийслэлийн төсөв хөрөнгөөр  баригдсан ч дутуу гүйцэтгэлтэй, чанарын шаардлага хангаагүй автозам, барилга байгууламжийн ажилд дутагдал гаргасан байгууллага албан тушаалтантай хариуцлага тооцох гэнэ. Энэ ажлыг Нийслэлийн мэргэжлийн хяналтын газар, Дотоод аудитын алба нь хариуцах юм байна. Э.Бат-Үүл нарын бодлого, PR-ыг түгээн цацагчдын явуулж буй мэдээллээс үзвэл энэ ажиллагаа нь өмнөх Хотын дарга нар, орлогч нар, газар, өмч хариуцсан дарга нар, ер нь л дээрх тендер хариуцсан нөхдөд зориулагджээ. Мэдээж хэрэг, тэр үеийн албан тушаалтнуудын нуруу хүйт дааж, айдас төрж байгаа. “Хар жагсаалт”-ын гол бай нь ажил гүйцэтгэгч компаниуд байх бололтой юм. Тэгж ч хэлцгээж байна. Гэвч аливаа тендерийн буруутнаар дан ганц ажил гүйцэтгэгчийг “шалгаруулах” нь зүйд үл нийцнэ. Олон ажил авлаа гэж буруутгах уу, хэр баргийн ажил яагаад танай компанид оччихов гэж хардах уу.

Яг үнэндээ манай бизнес­мэнүүдийн, барилгачдын, замчдын буруу огтоос биш. Тэдэнд том хэмжээний, олон ажил олдож байвал ажил нь бүтээд л явчихлаа гэсэн үг. Ерөөс зорилго нь тэр. Ингээд бодохоор өнөөгийн төр, ялангуяа нийслэлийн бодлого, үндэсний үйлдвэрлэгчид, бүтээн байгуулагчдаа шоглосон “операци” явуулж байна гэсэн үг. Сүр нь намдаж, сүүл нь арилаагүй байгаа “Эдийн засгийн форум”-аар өнөөх хэдэн барилгачин, замчин, баялаг бүтээгчид, үндэсний үйлдвэрлэгчид үйлээ үзэж байгаагаа ярьж л байна.

Чухамдаа тендерчин хэмээх нэрийг тэд зүүх учиргүй юм. Харин ийм нэрийг зүүгээд “Хар жагсаалт”-д бичигдэх ёстой хүмүүс бол үе үеийн албан тушаалтан тендерчид юм. Аж ахуйн нэгжийг дарамдалдаг, 10 хувь, түүнээс ч илүүг авдаг гээд ил болчихсон нууц ажиллагаа зөндөө байна.

Тиймээс өнгөрсөн засгийн тендерчдийг илрүүлэн, данслах нь туйлаас зөв. Гэхдээ нэг ажлыг умартаж болохгүй. Тендер өнөөдөр ч байж л байна. Нийслэлийн төсвөөр, нийслэлийн газар нутагт өнөөдөр ч зам, барилга барьж л байна. Таны доорх хүмүүс оролцож байж ч магадгүй. Өөрөөр хэлбэл, тендерчин танайд ч байж магадгүй. Айлын хүүхдийг алаг үзээд яах вэ ... гэдэг шиг өнөөдрийнхийгөө ч бас хамт шалгавал яасан юм. Юмыг яаж мэдэхэв, тендерчин байгаа ч юм бил үү. Байхгүй бол сайн л биз.