Ч.Олдох 

Парламентад  суудалгүй   намын дарга нар  болон Сонгуулийн хуулийн шинэчилсэн найруулгын төсөлд ажиллаж байгаа УИХ-ын ажлын хэсгийн хамтарсан хэлэлцүүлэгийг “Өдрийн сонин”-ы “Иргэний танхим” санаачлан зохион байгууллаа.

Хэлэлцүүлэгт намуудаас БНН-ын дарга Б.Жаргалсайхан, Хамуг Монголын Хөдөлмөрийн намын дарга Ц.Шинэбаяр, Ногоон намын дарга О.Бум-Ялагч, Эх орончдын нэгдсэн намын дарга Г.Ганбат, МАХН-ын Ерөнхий нарийн бичгийн даргын зөвлөх Г.Дүгэржав, ИЗН-ын улс төрийн зөвлөлийн гишүүн Г.Ганхүү, МҮАН-ын Ерөнхий нарийн бичгийн дарга Б.Цогтгэрэл нар оролцож байр сууриа илэрхийллээ. Ажлын хэсгээс Сонгуулийн хуулийн шинэчилсэн найруулгын төслийн ажлын хэсгийн ахлагч, УИХ-ын гишүүн  Р.Бурмаа болон УИХ-ын гишүүн Ц.Оюунбаатар, Д.Оюунхорол нар  оролцлоо.

Ажлын хэсгээс  хуулийг шинэчлэх шаардлага зайлшгүй бий гэдгийг онцлоод сонгуулийн үеэр гардаг аливаа маргаан, будилааныг нэг мөр шийдэхэд хуулийн зохицуулалт хийж өгнө хэмээн ярьж байна. Харин намын дарга нарын зүгээс санал тоолох машины дүнг засдаг явдлыг болиулах, машинаар тоолсоны дараа заавал гараар тоолж баталгаажуулдаг болох нь зүйтэй гэсэн нэгдмэл байр суурьтай байгаагаа илэрхийллээ.