Т.САЙХАН Тулгар төрийн 2227, Их Монгол Улсын 812, Ардын хувьсгалын 97 жилийн ой, Үндэсний их баяр наадмын хүчит 512 бөхийн барилдаанд ес даван түрүүлсэн Монгол Улсын шинэ аварга Н.Батсуурьд түрүү бөхийн бай шагнал “Ланд крузер-200” автомашиныг гардууллаа.  Нийслэлийн Засаг дарга  С.Батболд, Тоёота сэйлс Монголиа” ХХК-ийн гүйцэтгэрх захирал Тоширо Курахаши болон Монгол Улсын шинэхэн аварга Н.Батсуурийн гэр бүлийнхэн, бөх сонирхогчид оролцсон байна. Энэ  үеэр  Н.Батсуурь “Төрийн их баяр наадамдаа түрүүлж, Монгол Улсын аварга цолны эзэн болсондоо туйлын их баяртай байна. “Тоёота моторс” корпорацийн хамт олондоо нийт бөхчүүдийнхээ өмнөөс талархсанаа илэрхийлмээр байна. Цаашдаа олон бөхчүүд энэ шагналыг авах болтугай гэсэн ерөөл дэвшүүлье” гэлээ. Мөн Улсын их баяр наадмын үзүүр, түрүү авсан бөхийг нутгийнхан нь байр, машинаар байлдаг уламжлал тогтоод буй.  Н.Батсуурьд Увс аймгийн нутгийн зөвлөлөөс  “Хүннү” хороололд дөрвөн өрөө байр бэлэглэжээ.Харин улсын наадмын үзүүрт үлдсэн улсын аварга Б.Санжаадамбыг Архангай аймгийн “Бөх билэгт” дэвжээний хамт олон хоёр өрөө байраар байлаад байна. Эх сурвалж:www.polit.mn