Лениний музейг Үлэг гүрвэлийн төв музей болгох ТӨХ, ССАЖЯ-ны хамтарсан мэдэгдэл, МАН-ын гомдлыг эцэслэсэн шүүхийн шийдвэр  хэрэгжсэнгүй. МАН музейн байрыг өчигдөр хүлээлгэж өгөх үүрэг хүлээсэн ч “болзоо”-ндоо  ирээгүй юм. Цаашид ямар алхам хийх талаар Үлэг гүрвэлийн төв музейн  захирал Н.Жавзмаагаас тодрууллаа. 

-МАН танай музейн байрыг хүлээлгэж өгсөнгүй. Цаашид ямар алхам хийх гэж байна?

-Үлэг гүрвэлийн төв музей нь Лениний музейн байрыг хүлээж авах тухай ТӨХ-ны дарга, ССАЖ-ийн сайдын хамтарсан тушаал  гарсан шүү дээ. Тэр дагуу 6-7 хүний бүрэлдэхүүнтэй  ажлын хэсэг ажиллаж байгаа. ССАЖЯ-ны Төрийн нарийн бичгийн дарга П.Алтангэрэл  ажлын хэсгийг ахалж, нарийн бичгийн даргаар би ажиллаж байна.  Ямар ч байсан манай музейн байрыг  бидэнд хүлээлгэж өгнө гэдэгт итгэлтэй, хүлээж, бас яарч  байгаа. Энэ талаар ажлын хэсэг цаашид ажиллана.

-Таны хувьд байраа хурдан авахсан гэж яарч байна уу. Өчигдөр байраа хүлээж авна гэж  танай хамт олон бүгдээрээ үндэсний хувцсаа өмсч нэлээд бэлтгэж очсон юм шиг санагдсан?

 -Өчигдрийн хувьд баярлуулан гомдоосон юм боллоо. Бид байраа хүлээж авна гэдэгт итгэж байсан юм. МАН-ын байр хүлээлгэж өгөх хүмүүс ирсэнгүй. Дахиад бас шүүхээр явна гэж байгаа сураг дуулдаад байна.

-Батаарууд одоо хаана байгаа вэ?

-Батаарууд Дарханд байгаа. Музейн захирлын хувьд  хэлэхэд бид  ажлаа  хурдан хийхийг хүсч байна. Хурдан байртай болж, үзмэрүүдээ байршуулахсан. Зургадугаар сарын  1-ний эх үрсийн  баяраар батааруудаа  хүүхдүүдэд үзүүлэх сэн гэж хүсч байна.

-Музейг  хэрхэн тохижуулж дэглэх талаар бүх төлөвлөгөө гарсан гэл үү?

-Музейн байраа хүлээгээд авчихвал доторх засал, дэглэлт ямар байх талаар төлөвлөгөө бүгд гарсан. Музейн голд Байгалийн түүхийн музейд байсан том батаар, АНУ-аас ирсэн батаар хоёрыг тавина.  Энэ нь эцэг, хүү  хоёр уулзсан нь  гэсэн утгыг илэрхийлж байгаа юм. Мөн араас нь олон батаар ирнэ гэсэн утгыг агуулсэн. Түүний зэрэгцээ олон сонирхолтой, бас өвөрмөц зүйлүүд бий.

Ч.Олдох