Б.Байгаль НИТХ-ын ээлжит XVII хуралдаан өнөөдөр /06.28/ боллоо. Хуралдаанаар Нийслэлийн хүн амын ус хангамжийн аюулгүй байдлыг хангах, ариун цэврийн байгууламжийн ашиглалтыг сайжруулах дэд хөтөлбөр, агаарын бохирдлыг бууруулах мастер төлөвлөгөөг батлах тухай асуудлаар хэлэлцэв. Мөн НИТХ дахь АН-ын бүлгээс Нийслэлийн засаг  дарга бөгөөд Улаанбаатар хотын захирагч С.Батболдод гэр хорооллын дахин төлөвлөлтийн талаар асуулга тавьсан юм. НИТХ-ын  дарга С.Амарсайхан “Гэр хорооллын дахин төлөвлөлтийн ажил удаан явагдаж байна. Анхнаасаа буруу төлөвлөсөн байсан үүнийг засах гэж оролдож байна. Гэр хороолын дахин төлөвлөлт, орон сууцтай холбоотой олон ажлууд тархай, бутархай явагдсаар л. Нийслэлийн орон сууцны корпораци, гэр хорооллын дахин төлөвлөлтийн газар, Азийн хөгжлийн банкны дэд бүтцийн хөтөлбөр зэрэг энд тэнд, хэн юу хийж байгаа нь мэдэгдэхгүй зүйлүүд байгаа. Үүнийг шийдэхийн тулд орон сууцны бодлогын зөвлөл байгуулж, бодлогыг нэгдсэн зохион байгуулалттай болгохоор судалгаа хийн ажиллаж байгаа юм” гэлээ. Түүнчлэн НИТХ-ын  тэргүүлэгч Ц.Байгалмаа “Хүн амын ус хангамжийн аюулгүй байдлыг хангах, ариун цэврийн байгууламжийн ашиглалтыг сайжруулах дэд хөтөлбөрийн хувьд маш сайн хөтөлбөр гэж би харж байна. Энэ хөтөлбөрийн хүрээнд 912 тэрбум төгрөгийн хөрөнгө оруулалтын ажил хийгдэх гэж байна. Үүнд Төв цэвэрлэх байгууламжийг шинэчлэн барих 300 гаруй сая долларын ажил болон орон сууцны хороолол дунд тавигдсан байгаа усны шугамуудыг шинэчлэх хүрээнд Европын банкны санхүүжилттэй төсөл багтсан юм. Мөн Улаанбаатар хотын хүн ам анх төлөвлөж байснаасаа маш ихээр нэмэгдсэн. Үүнтэй холбогдуулж бид ундны усны хэмжээг нэмэхээс өөр аргагүй. Энэ төсөл хөтөлбөрийн хүрээнд доод эх үүсьэрийг бий болгохоор ажиллаж байгаа. Био комбинат орчмоор 25 гүний худаг гаргаж, үүнээсээ усан сан байгуулан тэнд дагуул хотууд байгуулах боломж бий болж байгаа юм” гэв. Эх сурвалж:www.polit.mn