Б.САРАНГЭРЭЛ Нийслэлийн Засаг дарга С.Батболд иргэдтэй уулзаж, тэдний санал санаачилга, хүсэлтэд хариу өглөө. Иргэдийн зүгээс өөрсдийн санаачлагаар хийж буй хэд хэдэн төсөлт ажлуудыг танилцуулан хамтран ажиллах хүсэлтээ тавьсан юм. Тухайлбал  Хан-Уул дүүргийн ХI хорооны иргэн П.Очирпүрэв хог хаягдлыг цуглуулж, ачих дэвшилтэт шийдэл бүхий "Экобин" ухаалаг хогийн савыг нийслэлийн хүн ихээр цуглардаг, орчны бохирдолтой дүүргүүдэд нэвтрүүлэх төслөө танилцууллаа. Энэхүү хогийн савын сайжруулсан хувилбарыг Бельги, Франц зэрэг орнуудад хэрэглэдэг бөгөөд хотын өнгө үзэмж, цэвэр байдалд ихээхэн нөлөө үзүүлдэг юм. Нэг хогийн савыг хийж газар ухан байрлуулахад өртөг өндөр, мөн өргөх зориулалт бүхий крантай автомашин шаардагдах тул эхний ээлжинд 1-2 байршилд суурилуулж туршин, хамтран ажиллахаар боллоо. Мөн Баянзүрх дүүргийн ХХV хорооны иргэн Б.Чинзориг оюуны спортыг олон нийтэд түгээн дэлгэрүүлэх  иргэдийн чөлөөт цагийг тав тухтай өнгөрөөх, шатар сонирхогч хүүхэд, залуусын сэтгэн бодох чадварыг сайжруулах зорилгоор шатар, оюун ухааны спортын талбай, эсвэл гудамж байгуулах төслөө танилцуулсан юм. Уг төслийг Нийслэлийн аялал жуулчлалын газрын зүгээс нийгэмд чиглэсэн эерэг үр дагавартай гэж үзэн хамтран ажиллахад бэлэн байгаагаа илэрхийлсэн юм. "Шатар оюун ухааны талбай" төслийг Үндэсний уэцэрлэгт хүрээлэн, Хүүхдийн парк, Цэрэндоржийн гудамжинд хэрэгжүүлэх саналтай байгаа юм байна. Иргэн Б.Чинзориг “Миний хувьд ямар нэгэн ашиг хонжоо харж төслөө эхлүүлээгүй. Шатар бол оюуны спорт учир хүүхэд залуучуудын хүмүүжил, төлөвшилд чухал ач холбогдолтой, тэдний сэтгэн бодон чадварыг хөгжүүлж, тэсвэр тэвчээр суулгаж чаддаг спорт. Тиймээс шатарт шамдан суралцах, сонирхох хүүхэд залууст болон иргэдэд ая тухтай орчин нөхцлийг бүрдүүлбэл оюуны томоохон хөрөнгө оруулалт болно” гэлээ. Ийнхүү нийгмийн хөгжил цэцэглэлт, сайн сайханд чиглэсэн иргэдийн төслийг Нийслэлийн Засаг даргын тамгын газраас дэмжин, хамтран ажиллахаар боллоо. Эх сурвалж: www.polit.mn