Т.САЙХАН УИХ дахь АН-ын бүлэг өнөөдрийн /06.25/ хуралдаанаараа Тавантолгойн төсөл, УИХ-ын хаврын чуулганы үр дүн болон УИХ-аар хэлэлцэгдэж байгаа зарим хуулийн төсөл гэсэн эдгээр гурван асуудлыг хэлэлцжээ. Хуралдаанаар хэлэлцсэн асуудлын талаар УИХ дахь АН-ын бүлгийн дарга Д.Эрдэнэбат мэдээлэл хийв. Тэрээр “Төрийн гурван өндөрлөгийн оролцсон шийдвэр бол улс төрийн зөвшилцлийн гол асуудал байдаг. Энэ тогтоолоор 30 хувийг олон улсын зах зээлд гаргана гэж байгаа бол төрийн өмчийнх 51 хувь, ард иргэдийн 14 хувь, Хөрөнгийн биржээр худалдаалагдсан хувьцааг ард иргэдэд үр өгөөжтэй байх тал дээр яаж хуваарилах вэ гэдгийг ажлын хэсэг дээр дахин хэлэлцэнэ. Энэ тогтоолын өөрчлөлтөөр эдийн засгийн үр ашиг нь бодитой тусах, Тавантолгой ард түмний мэдэлд очих нөхцөл бүрдсэн тохиолдолд дэмжинэ” гэлээ.  Мөн УИХ-аар яаралтай хэлэлцэгдэж байгаагаас гадна чуулган завсарлахтай холбоотой шахагдаж орж ирж байгаа олон хууль байгаа. Үүнд АН байр сууриа илэрхийлнэ. Тухайлбал, Аж ахуйн нэгжийн орлогын албан татварын тухай хуулийн төслөөр томоохон уул уурхайн компаниудад татварын илүү хөнгөлөлт үзүүлдгийг болиулах хэрэгтэй гэж АН үзэж байгаа. УИХ-ын Дэгийн тухай хуульд АН завсарлага авсан. Гишүүдийг хариуцлагатай, ёс зүйтэй болгох нь зөв. Хамгийн гол нь Дэгийн тухай хуульд Үндсэн хуулийн зөрчил гаргаж болохгүй. Үндсэн хуульд нэмэлт өөрчлөлт оруулах журмын тухай хуулийг Дэгийн тухай хуулиар оруулж ирсэн нь Үндсэн хуулийн зөрчилтэй байна гэж үзсэн. Мөн Захиргааны ерөнхий хуулийн өөрчлөлтийг АН дэмжихгүй. Бүх шатны захиргааны байгууллагыг энэ хуулиар шүүх боломжгүй болж байгаа юм. АН-ын бүлэг эрхзүйт төрийн тогтолцооны талаас нь харж, Засгийн газрыг огцруулах үндэслэл болно гэж үзэж байна” гэлээ. Мэдээлэл хийснийхээ дараа сэтгүүлчдийн асуултад хариулав. -УИХ-ын гишүүн Л.Оюун-Эрдэнэ 60 тэрбумын асуудлаар Нээлттэй сонсгол хийх тухайгаа мэдэгдсэн. Энэ асуудалд танай бүлэг ямар байр суурьтай байгаа вэ? - УИХ-ын гишүүдэд Нээлттэй сонсгол хийх эрх нь нээлттэй. Гэхдээ иргэдээс тодорхой хэмжээний тооны саналыг авсан байх ёстой. Энэ асуудлыг хэрхэх нь УИХ-ын гишүүн Л.Оюун-Эрдэнийн өөрийнх нь эрхийн асуудал. -Тавантолгойн ордыг эдийн засгийн эргэлтэд оруулснаар хэчнээн төгрөгийн хөрөнгө оруулалт орж ирэх бол? -IPO гаргана гэж байгаа. Энэ талаарх материалыг дөнгөж гар дээрээ авлаа, уншиж амжаагүй байна. Бидэнд маргаантай асуудал, болгоомжлол байгаа. Ажлын хэсэг дээр ойлголцоно. Эх сурвалж:www.polit.mn