Б.САРАНГЭРЭЛ Хавдар судлалын үндэсний төв, Монголын ходоодны хавдрын нийгэмлэг, БНСУ-ын ходоодны хорт хавдрын холбоо  хамтран “Ходоодны хорт хавдрын эрт илрүүлэг, оношилгоо, урьдчилан сэргийлэлт ба менежментийн орчин үеийн чиг хандлага” сэдвийн дор хоёр дахь удаагаа хуралдлаа.  Энэхүү хуралд БНСУ-ын Ходоодны хорт хавдрын холбооны тэргүүлэх профессор, Сөүлийн их сургуулийн  мэс заслын тэнхимийн профессорууд оролцож, уг өвчний орчин үеийн менежментийн чиг хандлага, мэс заслын орчин үеийн арга техникүүдийг танилцуулан, ходоодны хорт хавдартай тэмцсэн туршлагаас хуваалцжээ. Хурлын үеэр Монголчууд ходоодны хорт хавдрын өвчлөлөөр дэлхийд хоёрдугаарт, нас баралтын тоогоор нэгдүгээрт орж, 2017 оны байдлаар энэ төрлийн өвчлөлийн 890 шинэ тохиолдол бүртгэгдэн 600 гаруй нь нас барсан үзүүлэлттэй байгааг онцлоллоо. Тиймээс Хавдар судлалын үндэсний төвөөс ходоодны хорт хавдрын эрт илрүүлгийн хөтөлбөрийг зохион байгуулахаар болжээ. Тодруулбал, “Элэг бүтэн Монгол” хөтөлбөрийн хүрээнд элэгний хавдрыг эрт илрүүлэх, вирусын эмийг нь өгөх, элэг шилжүүлэн суулгах хагалгааг эх орондоо хийдэг болсон төдийгүй хөтөлбөрийг үргэлжүүлэхээр ажиллаж байгаа юм байна. Цаашид эмчилгээгээр дэлхийд тэргүүлэгч орнуудын нэг БНСУ-ын профессор эмч нартай хамтран ажиллаж шинэ технологи аргуудыг цаг алдалгүй нэвтрүүлэхээр төлөвлөж байгаа аж. Эх сурвалж: www.polit.mn