Т.САЙХАН Засгийн эрх барьж байгаа МАН-ынхан дотооддоо эв түнжингийн талаар ихэд асуудалтай байна. Угаасаа л энэ талаар ихээхэн асуудал байсан болохоор л нэг засгаа унагаж нөгөөхийг гаргаж ирсэн. Гэхдээ шинээр сонгогдсон Ерөнхий сайд, намын дарга У.Хүрэлсүх намын эв нэгдлийг хангаж ажиллахаа амласан хэдий ч түүнийгээ хэрэгжүүлэхэд намынх нь гал тогоог барьж байгаа генсек-ийнх нь зангараг хүрч байна уу? Нам доторх эв нэгдлийг хангаж ажиллах учиртай намын Ерөнхий нарийн бичгийн дарга Д.Амарбаясгалан яаж ажиллаад байна аа гэдэг асуудал УИХ дахь МАН-ын бүлгийн гурван ч хуралдааны үеэр хөндөгдөх дээрээ тулаад байгаа аж. УИХ дахь намын бүлэг өнгөрсөн даваа гаригт хуралдаандаа намын дарга, намын ерөнхий сайд нарыг байлцуулан зарим нэг асуудлыг ярих хэрэгтэй гэж үзэж, намынхаа эрхэм дарга нарт урилга илгээжээ. Гэтэл МАН-ын генсек Д.Амарбаясгалан  намын бүлгийн гишүүдээ хоёр цаг хүлээлгэсэн ч ирээгүй гэнэ. Парламент дахь намын бүлгийн гишүүддээ том гэдгээ харуулсан Д.Амарбаясгаланг хүлээж байгаа хөндүүр асуултуудын нэг нь намын санхүүжилт, тэр дундаа Ерөнхийлөгчийн сонгуулийн санхүүгийн тайлан, зарцуулсан мөнгөний жагсаалт баримтууд байгаа гэх мэдээлэл МАН-ын бүлэг хавиас дуулдаж байна. Магадгүй ойрын үед МАН-ын бүлэг намынхаа санхүүгийн тайлантай холбоотой асуудлыг хэлэлцэхэд нэг их гайхах зүйлгүй бололтой. Эх сурвалж:www.polit.mn