Б.Пунцагхорлоо Тайваний хүүхэд, гэр бүлийг дэмжих сангийн Монгол дахь төлөөлөл өнөөдөр албан ёсны төвтэй боллоо. Энэхүү байгууллага нь амжиргааны баталгаажих түвшнөөс доогуур орлоготой өрхийн эдийн засгийн чадавхийг сайжруулах, хүүхдүүдийг эрүүл саруул өсгөн төлөвшүүлэх, сургууль завсардуулахгүй сургах зорилготойгоор үйл ажиллагаагаа явуулдаг. Тус төвийн нээлтэд Тайваний хүүхэд гэр бүлийг дэмжих сангийн төв салбарын удирдагч, төлөөлөгчид болон хамтран ажиллагч ХНХЯ-ны харъяа, Гэр бүл хүүхэд залуусын хөгжлийн газар, ЭХЭМҮТ-ийн төлөөлөгчид ирж баяр хүргэсэн юм.  Одоогоор нийслэлийн есөн дүүрэг, төв аймгийн таван сумын зорилтот бүлгийн нийт 11 мянга орчим хүүхдэд тусламж дэмжлэг үзүүлж буй тус төв албан ёсны байртай болсонд хамтрагч байгууллагууд болон үйлчлүүлэгч хүүхдүүд баяртай байна. Энэ тухай Тайваний хүүхдийн сангийн нийгмийн ажилтан Ч.Гансүрэн хэлэхдээ “Манай сан 2004 оноос эхлэн Монгол Улсад үйл ажиллагаа явуулж байна. Өнгөрсөн хугацаанд, 12 жилийн турш бид Тайваний төвийн түрээсийн байранд үйл ажиллагаагаа явуулсан. Одоо өөрсдийн гэсэн шинэ байртай болсондоо баяртай байна. Цаашид хүүхэд залууст чиглэсэн үйл ажиллагаа, төсөл хөтөлбөрөө өргөжүүлэх бүрэн боломжтой боллоо” хэмээн сэтгэгдлээ хуваалцсан юм. Тайваний хүүхэд гэр бүлийг дэмжих сан нь хүүхэд залууст чиглэсэн олон төрлийн үйл ажиллагаа явуулдаг бөгөөд гол төлөв эрүүл мэнд, боловсролын чиглэлээр сургалт үйлчилгээ явуулдаг гэдгийг хамтран ажилладаг байгууллагын төлөөллүүд хэлж байв. Тухайлбал, тус төвийн санаачлагаар ЭХЭМҮТ-тэй хамтран орон нутгийн уруул, тагнайн сэтэрхий хүүхдүүдэд үзлэг эмчилгээ хийсэн байна. Мөн төсөлд хамрагдсан хүүхдүүдээ сар бүр мөнгөн тэтгэлгээр хангах, их дээд сургуулийн тэтгэлэг олгох, ЭЕШ-д бэлтгэх зэрэг үйл ажиллагаа явуулдаг байна. Түүнчлэн 2010 оноос хойш Хан-Уул дүүргийн XII хороонд байрлалтай “Гэр хотхон” төслийг хэрэгжүүлж байна. Уг төслөөр амжиргааны түвшин доогуур өрхөд гэр өгч байрлуулан мэргэжлийн сургалтуудыг зохион байгуулж байгаа аж.  Хэрэв тухайн өрхийн гишүүд хувийн ажил мэргэжилтэй болж, өмчийн газартай болвол гэрээ аваад бие даагаад  гарч болдог давуу талтай юм байна. Тайванийн хөгжлийн сангийн үйл ажиллагаанд идэвхтэй оролцдог зарим сурагчийн сэтгэгдлийн сонссон юм.    Нийслэлийн 21 дүгээр сургуулийн сурагч Э. Энхдалай  “Би 2010 оноос Тайваний хөгжлийн сангийн үйл ажиллагаанд идэвхтэй оролцож байна. Найман настайгаасаа уран сайхны гимнастикаар хичээллэсэн. Энэ хугацаанд Азийн аварга шалгаруулах тэмцээн, Улан-Үд болон Манжуур хотод зохион байгуулагдсан олон улсын тэмцээн зэрэгт амжилттай оролцсон. Мөн энэ хөгжлийн сангийн тусламжтайгаар өнгөрсөн гуравдугаар сард анх удаа Тайваньд очиж, Тайванийн ерөнхийлөгч Цай Ин-вен болон ивээн тэтгэгч нартай уулзсан. Бусад орны ард түмэн, тэдний нийгэм, соёлтой танилцах, тэднээс суралцах боломжийг бидэнд олгосон  хүүхдийн сангийн хамт олондоо маш их талархаж байна” гэсэн юм. Эх сурвалж: www.polit.mn