М.ЦЭЦЭГ

Хан-Уул дүүргийн есдүгээр хороонд шинээр баригдсан “Буянт-Ухаа-1” хорооллын барилгуудыг хэрхэн хуваарилах талаар Ерөнхий сайд сэтгүүлчидтэй уулзахдаа товч танилцууллаа. Тус хороололд  1764 айлын 32-68 ам метр талбай бүхий 28 барилга, автомашины дулаан зогсоол, хүүхдийн тоглоомын талбай, цэцэрлэг үйлчилгээний төв  баригдаж ирэх тавдугаар сард бүрэн ашиглалтад орно. Хорооллын эхний ээлжийн 567 айлын орон сууцыг есөн сарын хугацаанд барьж, өнгөрсөн нэгдүгээр сард ашиглалтад хүлээн авсан юм.  Энэ орон сууцны ам метр талбайг  нэг сая 280 мянган төгрөгөөр худалдана. Нийт орон сууцны 60 хувийг төрийн албан хаагчдад, 40 хувийг ахмад настан, хөгжлийн бэрхшээлтэй иргэд, залуу гэр бүлүүдэд хуваарилах юм байна.

Уг байрыг эзэмшигч 15 жилийн хугацаанд бусдад зарах буюу түрээслэхгүй байх гэнэ. Энэ тухай удахгүй батлагдах “Орон сууцны захиалга авах журамд” тусгах юм байна. Мөн  найман хувийн зээлд хамрагдах, өмнө нь орон сууц худалдан аваагүй байх зэрэг нөхцөлтэйгөөр уг байрыг иргэдэд олгоно гэдгийг Ерөнхий сайд хэллээ. 

Мөн Ерөнхий сайдын 30 минут уулзалтад Хүн амын хөгжил, нийгмийн хамгааллын сайд С.Эрдэнэ оролцож Шинэчлэлийн Засгийн газар цагаан сарын өмнө ахмадуудынхаа тэтгэврийг ажилласан жилээ нөхөн тооцуулсан болон бусад нөхцөлийг харгалзан 15-30 хувь нэмэгдүүлсэн талаар танилцууллаа. Тодруулбал, нийт тэтгэвэрийн доод хэмжээ 180300 төгрөг байсныг 207300 төгрөг болгож 15 хувиар, хувь тэнцүүлсэн тэтгэвэрийн доод хэмжээ 135200 төгрөг байсныг 172200 төгрөг болгож 18.6 хувиар өсгөсөн гэдгийг салбарын сайд мэдээлэв.