Б.ЗАЯА

 

Соёл спорт, аялал жуулчлалын яамны Соёл урлагийн бодлогын хэрэгжилтийг зохицуулах газрын дарга Н.Оргил ажлаа өгөхөө мэдэгдлээ. Тэрээр өөрийнх нь талаар сүүлийн үед гарч буй мэдээллийг няцааж албан тушаалд нь санаархсан хэсэг хүмүүсийн явуулга гэв. Н.Оргилыг өнгөрсөн оны аравдугаар сард зохиогдсон “Улаанбаатар” олон улсын кино наадмын төсвөөс хумсалсан, одоогийн албанд шударга бусаар томилогдсон тухай мэдээлж буй. Энэ тухайд тэрээр “Энэ бол хэсэг хүмүүсийн явуулга. Би одоогоор ажлаа өгөөгүй байгаа. 2013 оны аравдугаар сарын 2-нд Төрийн албаны зөвлөлийн шалгалтад ороод тэнцсэн. Хангалттай оноо авсан учраас 10 оноотой нэг шалгалтыг алгассан юм. Тэр үед томоохон арга хэмжээ давхацсан учир Төрийн албаны зөвлөлийн салбар зөвлөлийн дарга Н.Энхтүвшинтэй зөвшилцөж өндөр оноотой байгаа учир хангалттай тэнцэнэ гэж үзсэн. “Улаанбаатар” олон улсын кино наадмын хувьд нээлтийг нь монгол киногоор эхлүүлэх ёстой байсан. Тиймээс сонгон шалгаруулалт зарлахад хувийн студийн захирал, томоохон пи-арчин хүний бүтээсэн кино, нөгөө нь Ч.Хоролдорж найруулагчийн “Шарга даага” гэсэн хоёр кино ирсэн. Наадмын комисс “Шарга даага” киног дуу нэгтэйгээр сонгосон” гэв. Түүнчлэн “Яамны ажлыг хэсэг хүмүүс төрөл төрөгсдөөрөө нийлж бусниулж байна. Дэвшүүлсэн шинэ санаа, ажлыг минь үргэлж няцаадаг учир цаашид ажлаа үргэлжлүүлэх боломжгүй” гэлээ.