Д.НАДМИД Хөдөлмөр нийгмийн хамгааллын яам, Жендерийн үндэсний хорооноос олон улсын зарим байгууллагуудтай хамтран "Жендерийн мэдрэмжтэй сэтгүүлзүйд миний оролцоо" сэтгүүл зүйн шилдэг бүтээлийн болон "Жендерийн тэгш байдал миний дуранд" гэрэл зургийн уралдааныг зарласнаа саяхан дүгнэжээ. Уг уралдаануудын шилдэг бүтээлийн эздэд шагнал гардуулах ёслол өнөөдөр боллоо. Уг ёслолд УИХ-ын гишүүн, Засгийн газрын гишүүн, ХНХ-ын сайд С.Чинзориг, Азийн хөгжлийн банкны суурин төлөөлөгчийн үүргийг орлон гүйцэтгэгч Деклан Магий нарын албаны хүмүүс оролцож шилдгээр шалгарагчдад шагналыг гардуулав. Дүнг сонирхуулбал телевиз, радиогийн бүтээлийн төрөлд Игл ТВ-ын сэтгүүлч Б.Батцэцэг "Бодит байдал" сурвалжлагаараа тэргүүн байр эзэлсэн бол Эко ТВ, Монголын радиогийн хүүхэд залуучуудын редакцийн хамт олон удаахь байрыг эзэлжээ. Сонин, сэтгүүл, цахим мэдээллийн төрөлд "Өнөөдөр" сонины сурвалжлагч Х.Уянга тэргүүлж, сэтгүүлч Б.Цэцэгдэлгэр, Ц.Оюунтунгалаг нар удаалав. Тэгвэл гэрэл зургийн төрөлд УИХ-ын зурагчин Г.Эрдэнэтуяа тэргүүн байрын шагналыг авсан бол гэрэл зураг, сонирхогч Т.Али, Е.Нямдаваа нар хоёр гуравдугаар байр эзэлжээ. Эдгээр уралдаан 18 сая төгрөгийн шагналын сантай юм. Тэргүүн байрын шагналтнууд гэхэд 2 300 000-3 500 000 төгрөгийн шагнал хүртсэн юм. Эх сурвалж: www.polit.mn