Б.ТӨГС

ОБЕГ-ын дарга, онцгой байдлын хурандаа Т.Дуламдорж төв, орон нутгийн Онцгой байдлын анги байгууллагуудад  гал унтраах болон аврах ажиллагааны багаж хэрэгсэл, гардууллаа. Увс аймгийн Онцгой байдлын хэлтэст аврах ажиллагааны бүрэн тоноглолтой моторт завь олгосон бол Сэлэнгэ, Өвөрхангай аймгийн Онцгой байдлын газар,  хэлтэст УАЗ Фургон автомашин, Баян-Өлгий, Дархан-Уул, Дорнод, Өмнөговь, Сэлэнгэ аймгийн Онцгой байдлын газар, хэлтэст галын үндсэн албаны автомашин, Говьсүмбэр, Хэнтий, Дундговь аймгийн Онцгой байдлын газар, хэлтэст аврах ажиллагааны автомашин олгожээ.  Мөн жилийн аль ч улиралд байгаль, цаг агаарын ямар нөхцөлд явж үүрэг гүйцэтгэх онцлогтой газар уснаа явагчийг Нийслэлийн Аврах ангид гардууллаа.  

Гамшгийн аюулаас урьдчилан сэргийлэх мэдлэг, боловсролыг иргэдэд олгох, гамшгийн эрсдэлийг бууруулах, онцгой байдлын алба­ны үйл ажиллагааг сурталчлах зорилгоор Онцгой байдлын ерөнхий газрын дэргэд “Аврагч” студийг байгуулаад байгаа.  Тус студид НҮБ-ын хөгжлийн хөтөлбөр, Люксенбургийн Засгийн газрын санхүүжилтээр ОБЕГ-т хэрэгжиж буй “Орон нутгийн төвшинд гамшгийн эрсдэлийг бууруулах менежмент , зохицуулалтын чадавхийг сайжруулах нь” төслөөс 27.7 сая төгрөгийн өр­төг бүхий техник, то­ног төхөөрөмжийг бэ­лэг­лэлээ.

Мөн энэ үеэр Дэлхийн банкнаас хэрэгжүүлж буй “Шинэ болон дахин сэргэж буй халдварт өвчинтэй тэмцэх чадавхийг бэх­жүүлэх төсөл”-өөс ОБЕГ-ын Гамшгаас хамгаалах газрын Холбоо зарлан мэдээллийн хэлтэст холбооны хөдөлгөөнт удирдлагын байр бүхий тоноглолтой Ланд-200 автомашиныг гардуулсан юм. Онцгой байдлын албаны хэм­жээнд автомашин, тех­ник хэрэгслийн парк ши­нэч­лэл 2012 онтой харь­цуулахад 11 хувиар өссөн байна.