Б.Байгаль НИТХ-ын Тэргүүлэгчдийн өнөөдрийн /06.06/ хуралдаанаар  зургаан асуудлыг хэлэлцсэн юм. Хөгжлийн бэрхшээлтэй иргэдийг дэмжих нийслэлийн дэд хөтөлбөр батлах тухай, Тогтоол хүчингүй болгож, нийслэлийн өмчид хөрөнгө бүртгэн авах тухай, Нийслэлийн өмчид хөрөнгө бүртгэн авах тухай зэрэг асуудлыг эхэнд нь хэлэлцэв.  Нийслэлийн өмчийн харилцааны газрын дарга Ч.Однасан“ Өргөө зочид буудал,  Дүнжингарав  амралтын газрын барилга, байгууламжийг  нийслэлийн өмчид бүртгүүлэх асуудлыг өнгөрсөн дөрөвдүгээр сарын 19-ний өдөр Нийслэлийн Засаг даргын зөвлөлийн хуралдаанаар хэлэлцэж байгууламжуудыг Нийслэлийн өмчид хөрөнгө бүртгэн авах ёстой гэж үзсэн” хэмээн танилцуулсан.  Тэргүүлэгчид энэ асуудлыг хэлэлцээд  санал нэгтэйгээр баталлаа.  Үүний дараа Нийслэлийн  хүн амын ус хангамжийн аюулгүй байдлыг хангах, ариун цэврийн байгууламжийн ашиглалтыг сайжруулах хөтөлбөрийг батлах тухай хэлэлцэв. Тус хөтөлбөрт шинэ цэвэрлэх байгууламж байгуулах, цэвэр усны шугамыг шинэчлэх, гүний худгийн тоог нэмэхгүй байх зэрэг  асуудал багтжээ. Улаанбаатар хотын Ерөнхий менежер Т.Гантөмөр “Уг хөтөлбөрийг 2018-2021 онд хэрэгжүүлэх бөгөөд 911 тэрбум төгрөгийн хөрөнгө оруулалт шаардлагатай” гэв.  Мөн НИТХ-ын Тэргүүлэгчдийн хуралдаанаар 2018 онд орон нутгийн хөгжлийн сангийн хөрөнгөөр хэрэгжүүлэх хөрөнгө оруулалтын жагсаалтад өөрчлөлт оруулах тухай, Шашны байгууллагын зөвшөөрлийн хугацааг сунгах, цуцлах асуудлыг хэлэлцэн баталсан юм. Эх сурвалж:www.polit.mn