“Зууны мэдээ” сонин “Хүчирхийллийн эсрэг хамтдаа” сэдвийг эхлүүлж, долоо хоног бүр “50:50” байр суурийн буланг хүргэхээр бэлтгэлээ.

Ц.Оюунгэрэл: УУРЫН МЕНЕЖМЭНТ МАНАЙ ЗАЛУУСТ ХЭРЭГТЭЙ БАЙНА

Соёл, спорт, аялал жуулчлалын сайд

-Бид  залуусыг гэрлэхийн өмнө нэг юмаар хуурдаг. Хоёр хүн бие биедээ хайртай бол  хэзээ ч маргах ёсгүй, өөрөөр хэлбэл, романтик үл биелэх мөрөөдөлтэйгээр амьдралыг нь эхлүүлчихдэг. Гэтэл хоёр өөр боловсролтой, хоёр өөр орчинд өссөн, хоёр өөр хүн гэрлэхэд заавал маргаан гардаг. Энэ маргааныг хүчирхийлэл болгохгүйн тулд амьдралд эдийн засгийн, ёсзүйн гэх мэт санал зөрөлдөх асуудал олон тохиолддог гэдгийг залуучуудад ойлгуулах хэрэгтэй. Олон улсад уурын менежмэнт гэж хүртэл байна шүү дээ. Үр хүүхдэдээ асуудлыг хүчирхийлэлгүй яаж шийдэх вэ гэдгийг багаас нь зааж сургаж байх ёстой. Хамгийн гол нь биедээ гар хүрэхгүйгээр маргаанаа зөвөөр шийдэх соёлыг  эцэг эх, багш гэх мэт нийгмийн соёлыг түгээж байдаг хүн бүр ойлгуулж байгаасай.

Б.Дашдондог: ЭРЭГТЭЙ ХҮҮХДИЙГ ЗОДОЖ ӨСГӨХ НЬ БУРУУ

Монгол Улсын гавьяат жүжигчин, дуучин

-Энэ жилийг гэр бүлийн хүчирхийллийг эсрэг жил болгосон нь зүйтэй гэж үзэж байна. Энэ бол яах аргагүй ганцхан манай оронд биш, дэлхийн олон оронд тулгамдаад байгаа асуудал. Хүчирхийлэл хүчирхийллээс үүсдэг гэдэг. Тэр үнэн байх. Эцэг эх нь яаж үлгэр дуурайл үзүүлнэ үр хүүхэд нь тэгж л өсдөг. Нийгмийн бохир байдлыг арилгахын тулд эцэг эхчүүд эвтэй, зөв амьдарч эрэгтэй хүүхдийг буруу зүйл хийсэн тохиолдолд зодохдоо гол нь биш ярилцаж, ойлгуулах нь чухал болов уу. Хосууд нэг нэгнээ хүндэлдэг байгаасай.