Б.ЗАЯА

Нөөцийн махны өргөтгөсөн худалдаа өнгөрсөн бямба гаригт эхлэв. Өнгөрсөн сарын 25-наас сүлжээт дэлгүүрүүдээр худалдаалж байсан бол Сар шинийн баярыг угтан гэрээт компаниуд өргөтгөсөн худалдааг зохион байгуулж байгаа юм. Засгийн газрын “Хүнсний гол нэрийн бараа, бүтээгдэхүүний үнийг тогтворжуулах” дэд хөтөлбөрийн хүрээнд хотын хүн амын өвөл, хаврын улирлын хэрэгцээнд зориулж энэ жил 12 мянган тонн махыг “Баатрууд тэнгэр” болон “Эй эн ди эм” компани хамтран бэлтгэсэн. Бид Сонгинохайрхан дүүрэг дэх махны худалдааг сурвалжлахаар  “Цамбагарав” худалдааны төвийн гадна талбайг зорьсон юм. Тус дүүрэгт “Цамбагарав”-аас гадна Зүүн салааны тойрог, 21 дүгээр хорооллын Шөнийн захын гадна талбайд худалдаа үргэлжиллээ. 

Нөөцийн махыг сүлжээт дэлгүүрүүдээр худалдаалж байсан бол өргөтгөлөөр гэрээт компаниуд гадна талбайд гар дээрээс зарсан нь энэ юм. “Цамбагарав” худалдааны төвийн гадна талбайд “Эй эн ди эм” компани хоёр машинаар зэрэгцэн 3.5-5 тонн хүртэлх махыг борлуулахаар төлөвлөжээ. Тус компанийн хувьд 6000 тонн мах бэлтгэх гэрээтэй, оны өмнө бэлтгэлээ бүрэн базаасан гэнэ. Өнгөрсөн бямба гаригаас өргөтгөсөн худалдаа эхэлсэн учир эхний өдөр худалдан авагчид тааруу байжээ. Иргэд мэдээллээ бүрэн аваагүй бололтой. Харин өчигдрийн худалдааг дараалал үүсгэн хүлээж эхэлсэн байлаа. Үнийн хувьд үхрийн мах 5700, ямааны мах 4650, хонь 5500 төгрөг. Жижиглэнгийн үнэ нь үхрийн мах 5950, ямаа 4900, хонь 5750 төгрөг юм байна. Энэ нь зах зээлийн үнээс 500-1000 төгрөгөөр татуу юм. Харин цул махыг одоогоор борлуулж эхлээгүй байгаа ажээ. Худалдан авагчид махны чанарт ам сайтай байв. Тэд голдуу хонины махыг гулуузаар авч байлаа. Хонины мах гулуузаараа 23-30 орчим кг жин татаж байна.

Нөөцийн махны өргөтгөсөн худалдаа нийслэлийн есөн дүүрэгт 10 гаруй цэгт өнгөрсөн амралтын өдрүүдэд 10-16 цаг хүртэл үргэлжилсэн юм. ҮХААЯ-наас уг арга хэмжээг 29 хүртэл үргэлжилнэ хэмээн зарласан. Гэхдээ өнгөрсөн амралтын өдрүүдийнх шиг олон цэгүүдээр худалдаалахгүй бололтой. Ирэх лхагва гаригаас эхлэн “Мишээл экспо” болон “Дүнжингарав” худалдааны төвд эхлэх “Монголд үйлдвэрлэв” үзэсгэлэн худалдааны үеэр өдөр бүр нөөцийн махыг борлуулах гэнэ. Хэрэв борлуулалт сайн байгаа тохиолдолд цэгүүдийг нэмж магадгүйг гэрээт компаниуд хэлж байна.