Д.ЭНХЭЭ

  Хятадын Циндао хотноо зургадугаар сарын 9 ,10 – ны өдөр  болох ШХАБ – ын чуулга уулзалтын үр дүнгээр 20 орчим баримт бичиг батална хэмээн Ерөнхий нарийн бичгийн дарга Рашид Алимов мэдэгдэв. "Циндаод болох чуулга уулзалтаар терроризмтэй хийх эвлэршгүй тэмцэл, экстремизмын эсрэг үйл ажиллагаанаас эхлэн худалдаа, эдийн засаг, байгал орчны хамгааллын салбар дахь хамтын ажиллагааг өргөжүүлэх хүртэлх олон улсын болон бүс нутгийн бараг бүх талын асуудлыг хамарсан 20 орчим баримт бичиг батлах төлөвтэй байна.” – хэмээн өнгөрсөн баасан гарагт эхэлсэн ШХАБ – ын хэвлэл мэдээллийнхний анхны чуулга уулзалтын нээлт дээр Алимов мэдэгдэв. Улс төрийн, гол үр дүнгийн баримт бичиг бол Циндаогийн тунхаг бичиг байх болно хэмээн тэрээр мөн тодотгож хэлэв. Үүнээс гадна улс орнуудын тэргүүнүүд ШХАБ – аас залуу үеийнхэнтэй ажиллах их ажлын гараа болгож залуучуудад хандсан тусгай уриалга гаргах ажээ. Мөн соёл хоорондын харилцан яриа, шинжлэх ухаан, боловсролын салбарт харилцан хамтарч ажиллахад онцгой анхаарал хандуулна хэмээн Алимов нэмж тодруулав. ЮНЕСКО – той хамтарч ажиллах санамж бичигт гарын үсэг зурахаар бэлтгэж байгаа юм байна. "Циндаогийн чуулга уулзалтыг энэ оны эхний хагасын олон улсын гол үйл явдалд зүй ёсоор хамааруулж болно“ – хэмээн тэр онцлов. Шанхайн хамтын ажиллагааны байгууллага бол засгийн газар хоорондын байнгын үйл ажиллагаатай олон улсын байгууллага бөгөөд 2001 оны зургадугаар сарын 15 – нд Шанхайд анх байгуулагдсан. Одоо ОХУ, Хятад, Энэтхэг, Пакистан, Казах, Киргиз, Тажик, Узбек улсууд тус байгууллагын гишүүн. Белорусь, Иран, Монгол зэрэг орон тус байгууллагын ажиглагчийн статустай. Энэтхэг, Пакистан улсууд 2017 онд Шанхайн хамтын ажиллагааны байгууллагын бүрэн эрхт гишүүн болцгоосон.   Эх сурвалж:www.polit.mn