Б.УРАН

Дорноговь аймгийн Их хэт, Даланжаргалан, Айраг сумын нутагт байгалийн өнгөт чулууг түүж, хараа хяналтгүйгээр урагш нь гаргаж байгаа асуудлыг хөндсөн цуврал сурвалжлагыг шинэ оны өмнөхөн манай сонин хүргэсэн билээ. Байгалийн чулууг тармуур, ноолуурын сам ашиглан их хэмжээгээр түүж байгаа нь говь нутгийг усгүй болох, цөлжилт ихсэх зэрэг бодит аюулд хүргэхэд ойрхон байна. Энэ асуудлыг зөвхөн бичээд өнгөрөх биш таслан зогсоож, бодит үр дүнд хүрэхийн тулд хэвлэл мэдээлэл, хил гааль, хяналтын байгууллага, орон нутгийн удирдлагуудын хамтын оролцоо маш чухал юм. Чулууны ченжүүд мөн нутгийн иргэд чулууг хэрхэн түүж, газрыг яаж хөндөн сийчиж байгааг харуулсан бодит бичлэг, гэрэл зургийг орон нутгийн иргэдээс бидэнд ирүүлсээр байгаа билээ. Хятадууд худалдаж авсан чулуугаа улиралдаа нэг удаа онгойдог Сайншанд сумын Ханги-Мандалын боомтоор гаргадаг гэсэн мэдээлэл байгаа ч тус боомтоор хууль бусаар чулуу гарсан тохиолдол бүртгэгдээгүй гэж гаалийн байгууллагаас мэдээлсэн юм. Үнэхээр чулуу хилээр гарахгүй л байгаа бол энэ иргэд ингэж улайран түүх ямар ч шаардлагагүй билээ. Тиймээс энэ явдлыг таслан зогсоохын тулд хэвлэлийнхэн бид хөндсөөр бичсээр байх болно. Энэ удаад Дорноговь аймгийн Засаг дарга П.Ганхуяг танд дараах асуулгыг хүргүүлж байна. Та заавал хариулаарай.