Б.ЭНХЗАЯА

Төмрөнд цохиулж амиа алдсан залуугийн хоёр жилийн өмнөх ослыг санагдуулам харамсалтай явдал өчигдөр боллоо.

Чингэлтэй дүүргийн тавдугаар хороо, С1 телевизийн байрны хойд зам дээр 10.30 цагийн үед “Макс өргөө” компанийн “Макс тауэр” хотхоны барилгын ажлын явцад бэхэлгээний төмрийн дамнуургын олс тасарч замын хөдөлгөөнд оролцож явсан 31-39 УНР улсын дугаартай “Toyota Land Cruiser-200” загварын автомашины дээр унажээ. Биднийг ослын газар дээр очиход 15 давхраас унасан барилгын хэлхээ төмөр автомашиныг хоёр хэ­сэгт хуваасан дүр зу­раг угтав. Барилгын ажил­чид 15 давхарт гадна өнгөлгөөний пасад нааж байсан байна. Тасар­сан гэх дамнуурган дээр хоёр ажилтан өн­гөл­гөө хийж байсан бө­гөөд бэхэлгээний олс та­сарч дамнуургын нэг хэсэг төмөр нь газарт ши­дэгджээ. Энэ үед барил­гын өмнөх зам бага зэрэг ачаалалтай байсан гэнэ. 15 давхраас унасан төмөр автомашины арын хэсэг болон хүрдний хэсгийг дарж унаснаар жолоочийн аминд хүрчээ. Хохирогч замын гуравдугаар эгнээнд хөдөлгөөнд оролцож явсан бөгөөд автомашиндаа ганцаараа явжээ.

Ослын газарт цагдаа, аврах ангийнхнаас гадна Шүүхийн шинжилгээний үндэсний хүрээлэн, нийс­лэлийн шүүх шин­жил­­гээний газрын ажилт­нууд хоёр цаг ор­чим ажиллав. Хэргийн газрын үзлэг дуусах үеэр хохирогчийн цогцсыг 12.25 цагт Шүүхийн шинжилгээний үндэсний хүрээлэн рүү авч явсан юм. Шинжээчид хохирогчийн биед хийсэн анхан шатны үзлэгээр түүнийг 36 настай Б бо­ло­хыг тогтоожээ. Ха­рин цагдаагийн газраас тогтоол ирэнгүүт шин­жилгээ хийхээ дуулгаж байлаа. Албаны эх сур­валжийн мэдээлж буй­гаар хохирогч Эдийн зас­гийн хөгжлийн яамны харьяа “Гудамж” төслийн ажилтан байсан гэнэ.Уг хэрэгтэй холбогдуулан Нийслэлийн цагдаагийн газраас барилгын ком­панийн ажилчдыг бай­цааж эхэлсэн тухай эх сурвалж мэдээлсэн юм. “Макс өргөө” компани хоёр жилийн өмнөөс Чингэлтэй дүүргийн тавдугаар хороонд “Макс тауэр” оффисийн зориулалттай 18 давхар барилгын ажлыг эхэлсэн. Төв замаас хэдхэн алхмын зайд байрлах уг барилгын гадна өнгөлгөөг Солонгосын хөрөнгө оруулалттай “Фасад Ин” компани гүйцэтгэж байжээ. Барилгын тухай хуульд барилгын гадна ажлыг хасах таван хэмийн хүйтэн нөхцөлд гүйцэтгэж болно гэж заасан байдаг. Гэвч идэр ес тачигнасан энэ үед гадна өнгөлгөөг хийж байсан нь ийнхүү эрдэнэт хүний аминд хүрэх нөхцөл бүрдүүлсэн байж мэдэх. Мөн уг барилгын аль ч давхарт хаалт, бэхэлгээ байдаггүйг энд онцолъё. Ийм нөхцөлд бэ­хэлгээ тасарсан дам­нуурган дээр хоёр ажил­тан байсан ч тэд азаар зуурч үлдсэн тухай эх сур­валжууд мэдээлж байна. Барилгын салбар дахь хариуцлагагүйн “зуд” хэдэн хүний амиар төгсөх бол?