Б.ЭНХЗАЯА

Орон сууцтай болно гэсэн армийнхан нүдээ ширгэтэл хүлээж буй нэгэн барилгыг энэ удаагийн дугаартаа сурвалжиллаа. Монгол цэргийн музейн хажууд сүндэрлэж буй 10 давхар барилгуудын шавыг гурван жилийн өмнө тавьсан юм. Батлан хамгаалахын сайд асан Л.Болдын санаачлагаар 2011 онд 300 айлын орон сууц барих ажлыг эх­лүүлж, улсын төсвөөс 10.3 тэрбум төгрөг гаргуулж байсан. Гэвч гурван жил өнгөрөхөд барилгын ажил дуусаагүй байна.

Армийнханд хаягласан тус орон сууцыг барих тендерт “Спейшл” гэх компани шалгарсан ч эрхийг нь өгөөгүй гэдэг. Сураг дуулахад уг компани УИХ-ын гишүүн асан “молекул” Б.Батбаярын хүүгийн компани гэх. Өмнөх ажлууд нь урагшгүй байсан уг компанид Сангийн яамнаас санхүүжилт өгөхөөс татгалзсан юм билээ. Гэвч төд удалгүй уг барилгыг барих эзнээр“Хөх монголын тэнгэр” буюу “ХөМоТэ” гэх компани тодорчээ. Гэтэл уг компани нь өмнөх тендерт шалгарсан “Спейшл” компани байж таарч. Үүнийг тухайн үед Батлан хамгаалах яамны зарим нэг нь мэдэж байсан ч санхүүжилтээ шилжүүлсэн байна. 2011 оны есдүгээр сард байгуулсан гэрээ ёсоор дараа оныхоо дөрөвдүгээр сард 230 айлынхыг, хоёрдугаар улиралд нь 70 айлын орон сууцыг ашиглалтад оруулахаар заасан байжээ. Харин одоо жил гаруйн хугацаа өнгөрлөө. Чухам яагаад ашиглалтад орохгүй байгаагийн шалтгаан гүйцэтгэгч компанитай холбоотой болохыг албаны хүмүүс учирлаж байна. Ажлаа эхлэхээсээ өмнө санхүүжилтээ авчихсан “ХөМоТэ” буюу “Спейшл” компани хөрөнгө байхгүй гээд гэдийж байгаа сурагтай. Нэгэнт л мөнгөө авчихсан хойно сурсан зангаараа ийн аяглах нь гарцаагүй. Зэвсэгт хүчний удирдлагууд тухайн үед толгойг нь илээгүй бол өдийд бидний татварын мөнгө үр дүнтэй өөр ажилд зарцуулагдах байсан ч байж мэдэх. Ямартаа ч энэ зун барилгын ажил үргэлжилсэн аж. Яамны барилга захиалагчийн албаны инженерүүдийн хэлж буйгаар ирэх оны долдугаар сард ашиглалтад оруулах төлөвлөгөөтэй гэнэ. Гэхдээ хөрөнгө мөнгө байхгүй учир барилгын ажил олигтой ахиагүй бололтой. Басхүү барилгыг дулаан, цахилгаанаар хангахгүй болсноо нийслэлээс мэдэгдсэн байна. Барилга доорхи шугам сүлжээ хүрэлцэхгүй хэмээн тайлбарлажээ.  Учир нь тус компани анхнаасаа техникийн нөхцлөө аваагүй учир өөр сувгаар цахилгаан, дулаанаа авах тухай ярилцаж байгаа гэнэ.

Нар салхинд гундан байж ажил үүргээ гүйцэтгэж яваа олон зуун энгийн албан хаагчид нэг насны амьдралыг нь төвхнүүлэх орон сууцны сургаас атгаад алдсанд битүүхэндээ бухимдаж сууна. Яамных нь удирдлагууд бүтэлгүй нөхөдтэй “санаа нийлж” хөрөнгө мөнгө, цаг хугацаагаар тоглосоор байна.

“Спейшл” компани Батлан хамгаалах яамтай зөвхөн барилгын ажлаар холбоотой бус гэх мэдээлэл ч бий. Хятадын Засгийн газраас үзүүлсэн тусламжийн бараа, түүхий эдийг уг компаниар дамжуулан борлуулдаг тухай албан бус эх сурвалж мэдээлсэн юм. Гэхдээ эл үйлдэлдээ бас л дахин өөр нэрээр оролцсон гэдэг.