Д.ЭНХЭЭ Оросыг Крымтэй холбосон цорын ганц зам болох гүүрийг Владимир Путин нээв. Ийнхүү тэрээр хүчээр нэгтгэсэн хойгт Москвагийн эрх мэдлийг илтгэн харуулж, крымчүүдийн тусгаарлагдсан ганцаардмал байдлыг багасгав. Гүүрийн нийт урт 19 км, дөрөв орчим км усан дээгүүр явна. Энэ бол Орос дахь хамгийн урт гүүр бөгөөд хамгийн нарийн түвэгтэй инженерийн төсөл юм. Лхагва гарагаас автомашин зорчих дөрвөн эгнээ зам нээгдэх бөгөөд ирэх жил төмөр замыг ашиглалтад оруулна. Төслийн нийт өртөг нь 2,7 тэрбум фунт стерлинг. 2014 онд Украины мэдэлд байсан Крымыг Орос улс эзэлснээс хойш нэр хүндийн чансаа нь 80 хувиас илүү төвшинд хадгалагдсаар байгаа Путин өөрөө биечлэн уг төслийн хэрэгжилтийг хянаж байсан. Энэ гүүр түүний хувьд ялалтын бэлгэ тэмдэг болсон. Оршин суугчид нь үндсэндээ хүчээр нэгтгэхийг дэмжсэн Крымд энэхүү төсөл ихээхэн талархал хүлээдэг. Гэхдээ тэд Украинтай хийх худалдаа наймаа зогссоноос хойш хүнс, бараа бүтээгдэхүүний өндөр үнийн хүндрэл бэрхшээлтэй тулгарч байгаа. Үндэсний нэр хүндийн асуудал болсон гүүрийг бүтээн байгуулах зорилтыг хүүхэд ахуйдаа Путинтэй хамт жүдогоор хичээллэдэг байсан Аркадий Ротенбергийн компаниудад оногдуулсан. Хүчтэй салхи, шуургаараа алдартай Керчийн хоолойг дамнуулан гүүр тавина гэдэг бол зөвхөн геополитикийн ялалт төдийгүй, инженерийн ухаан бодлын жинхэнэ ололт амжилт болсон юм. Гүүр 595 тулгууртай, зарим шонг 100 орчим метрийн гүнд суулгасан. 1945 онд хоолойг дамнуулан гүүр барьсан боловч цөн түрэх үед нурж урссан. Асар том хоёр нуман хаалгыг эрэг дээр эхэлж угсраад дараа нь чиргүүл онгоцоор босгох газарт аваачсан. Үүнээс өмнө Оростой холбох гол зам бол давалгаа ихтэй Керчийн хоолойн гатлага онгоцоор туулдаг байв. Тэр үед гатлага онгоцонд дугаар хүлээж хэдэн цаг, заримдаа хэдэн өдөр, хоног болдог байсан бол одоо эх газрын хэсгээс Крым хүрэхэд ачааны машинаар 20 минут л явна. Эх сурвалж: www.polit.mn