Д.ЖАРГАЛАН “Гэр хороолол” хөдөлгөөнийхөн олон нийтэд хандлаа. Тус хөдөлгөөн үүсгэн байгуулагдаад удаагүй ч 1000 гаруй  гишүүнтэй болоод байгаа аж. “Гэр хороолол” хөдөлгөөнийхөн өнгөрсөн гуравдугаар сарын 9-ний өдөр Нийслэлийн Засаг дарга  С. Батболдтой уулзаж гэр хорооллын иргэдийн эрүүл аюулгүй орчинд амьдрах эрх зөрчигдөөд байгаа тухай найман шаардлага бүхий хүсэлт  тавихад “Гэр хороололд хүрч ажиллах боломжгүй” гэсэн хариуг авчээ. Хурлын үеэр  хөдөлгөөний тэргүүн Б. Батсүх “Манай хөдөлгөөн майхантай суултыг тавдугаар сарын 10-нд зохион байгуулсан.  Хоёр дахь жагсаалаа 17-ны өдөр  25 гишүүний хийхэд цагдаагийн албан хаагчид хүчээр тараасан. Нийслэлийн захирагчийн ажлын албанд жагсаал хийх хүсэлтээ журмын дагуу явуулсан боловч 20:00 цагт утсаар боломжгүй гэсэн хариу өгсөн.Гэр хороолын иргэд сайн сайхан амьдрах гэж хүсэж мөрөөдөж, тайван замаар үзэл бодлоо илэрхийлж байсан.  Цагдаагийн албан хаагчид хүч хэрэглэн, зориудаар зам хааж, биднийг баривчлах эрх байхгүй . Бид жагсаал хийх хүсэлтээ НЗДТГ өгсөн. Бидний жагсаалыг хүчээр тараасан  Х. Болормаад гомдолтой байгаа учир шүүхэд хандахаа мэдэгдэж байна. Гэр хорооллын иргэдийн амьдралыг сайжруулах талаар юу ч хийхгүй, дахин төлөвлөхийг ч хүсэхгүй байгаа Хотын дарга С.Батболдыг  огцрохыг  шаардаж байна” гэлээ. Тус хөдөлгөөн нь нийт 40 орчим гэр хорооллын алслагдсан хороодод ажилласан байна. Хөдөлгөөний тэргүүлэгч  Нарангэрэл “Майхантай цуглаан хийгээд суулт хийж байх үед цагдаагийн удирдлагууд хууль сахиулах сургуулийн оюутнууд болон энгийн хувцастай цагдаа нарыг бидний дунд оруулсан. Буудалцая, алаад өгье гэх мэтээр албаар турхирсан,зориуд  эмх замбараагүй байдал үүсгэх гэсэн бусармаг үйл явдал болсон. Уг нь бол цагдаагийн байгууллага иргэдийнхээ үзэл бодлоо чөлөөтэй илэрхийлж байхад аюулгүй байдлыг хамгаалж, дэмжих ёстой байтал эсрэгээрээ байсанд харамсаж байна. Манай хөдөлгөөн тууштай тэмцэнэ. Жагсаалд оролцсон 25 иргэнийг  СБД-н цагдаагийн газарт шөнийн 02:00 цаг хүртэл саатуулсан” гэлээ. Эх сурвалж: www.polit.mn