Бөхийн  “Увс нуур” галын 20 жилийн ой - Монгол бөхийн баярыг угтан бөх сонирхогч олон түмэн, хойч үеийнхэндээ үлгэр дуурайл болгох үүднээс Үндэсний дархлаа, өв соёл заншлын гол цөм болсон монгол бөхийн ёс жудаг, түүхэн уламжлал, өвөрмөц нандин бүхнийг товойлгон алдаршуулж, сурталчилан таниулах зорилгоор энэхүү уралдааныг зарлажээ. Бөхийн ”Увс нуур” галаас санаачлан Монголын Зохиолчдын Эвлэлтэй хамтран зохион байгуулж буй “Монгол бөх-Монголын бахархал” шүлгийн уралдааны тэргүүн байрыг сая төгрөгөөр урамшуулах бол дэд байрыг 500 мянган төгрөг, 3-р байранд шалгарсан уран бүтээлчийг 300 мянган төгрөгөөр шагнах юм байна. Харин тусгай байрын шагналд гурван хүнийг шалгаруулан өргөмжлөл, 100 мянган төгрөгөөр урамшуулна. Уралдааны бүтээл нь монгол бөхийн өргөн дэлгэр сэдэв агуулгад багтах ёстой ба аварга, арслан, заан, гарьд, харцага, начин цол, цолтонд зориулсан байх боломжтой. Уралдаанд шүлгээ сойх хүсэлтэй яруу найрагч,  зохиолч,  бөх сонирхогчдын бүтээлийг энэ сарын 15-ныг дуустал МЗЭ-ийн байрны 206 тоотод хүлээн авах бөгөөд “Увс нуур” галын 20 жилийн ой -Монгол бөхийн баярын ёслолын үеэр шагналыг гардуулна. Зохион байгуулагчдын зүгээс шилдэг бүтээлүүдийг ном болгон эмхтгэхээр төлөвлөжээ.