М.ЦЭЦЭГ

Манай улсын Ерөнхийлөгчийн урилгаар төрийн айлчлал хийж байгаа Канад улсын Амбан захирагч Дэвид Жонстоны айлчлалын хүрээнд Монгол, Канадын талууд нэг баримт бичиг солилцож, хоёр баримт бичигт гарын үсэг зурав. Канад улсын иргэдийг 30 хүртэл хоногийн хугацаанд Монголд визгүй зорчихыг зөвшөөрсөн ноот бичгийг Гадаад харилцааны сайд Л.Болд, Канад улсаас Монгол Улсад суугаа Онц бөгөөд Бүрэн эрхт Элчин сайд Г.Гөүлдхок нар солилцлоо.

Мөн Монгол Улсын Үйлдвэр, хөдөө аж ахуйн яам, Канадын Арилжааны корпорац хооронд хөдөөгийн малчдын амьдралын төвшинг дээшлүүлэхээр харилцан ойлголцох санамж бичигт Монгол Улсын Үйлдвэр, хөдөө аж ахуйн сайд Х.Баттулга, Канад улсаас Монгол Улсад суугаа Онц бөгөөд Бүрэн эрхт Элчин сайд Г.Гөүлдхок нар гарын үсэг зурав.

Монгол Улсын ХААИС, Канадын Саскатчеваны Их сургуулийн хооронд хамтран ажиллах тухай харилцан ойлголцлын санамж бичигт Монгол Улсын ХААИС-ийн захирал Т.Хэрүүга, Канадын Саскатчеваны Их сургуулийн Хөдөө аж ахуй, био нөөцийн сургуулийн захирал Мэри Бухр нар гарын үсэг зурлаа.

Дараа нь Ерөнхийлөгч Ц.Элбэгдорж, Канадын Амбан захирагч Дэвид Жонстон нар сэтгүүлчдэд мэдээлэл хийсэн юм.  Монгол Улсын Ерөнхийлөгч “Эрхэмсэг ноён Дэвид Жонстонтой албан ёсны хэлэлцээ хийлээ. Энэ айлчлал бол Канадын талаас хийж байгаа анхны төрийн айлчлал юм. Мөн Канад-Монголын хооронд дипломат харилцаа тогтоосны 40 жилийн ойн хүрээнд болж байгаа чухал айлчлал. Бид олон салбарт хамтран ажиллах боломжтой. Хүмүүс хоорондын харилцаа маш чухал гэдгийг сая ярилаа. Айлчлалын хүрээнд олон баримт бичигт гарын үсэг зурснаас гадна хөдөө аж ахуй, барилга, дэд бүтэц, уул уурхай, эрүүл мэндийн салбарт Монгол, Канадын хооронд хамтран ажиллах өргөн боломж байгаа талаар ярилцлаа. Канад улсын Амбан захирагчийн Монгол Улсад хийж байгаа айлчлал хоёр орны харилцаанд шинэ хуудас нээсэн, үр дүнтэй сайхан айлчлал болно гэдэгт итгэж байгаагаа илэрхийлье. Айлчлалд амжилт хүсье” гэв.

Канад улсын Амбан захирагч Дэвид Жонстон “Монгол Улсад төрийн айлчлал хийхээр хүрэлцэн ирсэн Канад улсын анхны Амбан захирагч болж байгаадаа би сэтгэл хангалуун байна. Бидний харилцаа ардчилал, хүний эрх, эрх зүйт төрийг дээдлэх нийтлэг үнэт зүйлс дээр суурилж байдаг. Бидний эдийн засгийн харилцаа, ялангуяа байгалийн нөөц ашиглалтын салбар дахь хамтын ажиллагаа харилцан ашигтай хөгжихийн зэрэгцээ бидний түншлэл илүү олон талт, өргөн хүрээтэй болж байна. Өнөөдөр бид ардчиллыг хөгжүүлэх, сайн засаглалыг бэхжүүлэх, энхийг сахиулах, бүс нутагт болон дэлхийд аюулгүй байдлыг хангах тал дээр түншлэн ажиллаж байна.Таван жилийн өмнө Улаанбаатар хотноо Канадын ЭСЯ-ыг нээсэн нь бидний холбоо гүнзгийрснийг илтгэсэн томоохон алхам болсон бол одоо бидний харилцаа цэцэглэн өрнөж байна гэж дүгнэх бүрэн боломжтой болоод байна” гэв. Мөн  Амбан захирагч Дэвид Жонстон УИХ-ын хүндэтгэлийн хуралдаанд үг хэлсэн бөгөөд түүнд УИХ-ын дарга З.Энхболд, Ерөнхий сайд Н.Алтанхуяг нар бараалхав.